江陵2日1夜行程推介
江原道江陵2日1夜行程點安排好？有專為外國人而設嘅的士？好多美食等住你！
Hello，大家好，我哋係由韓國人每日提供最新韓國旅行資訊嘅Creatrip。
喺疫情期間，大家冇得出國，江陵喺呢段時間多咗好多新景點，因為都算近首爾，唔少韓國人放假都會去玩，如果大家鍾意睇海嘅話，小編超推薦大家可以嚟玩吓！
江陵交通方式
由首爾點去江陵？
由首爾可以搭KTX直接去到江陵站（강릉역），坐大約2個鐘，如果想慳錢嘅朋友，亦可以搭高速巴士（東首爾）坐3個鐘去到江陵，無論係現場買，定係喺txBus、BusTago等網站（右上角揀中文 / CHINESE / 중국어）訂都得，而回程只要喺原本車站買飛返首爾就可以。
江陵2日1夜景點推介
烏竹軒（오죽헌）
- 地址：강원도 강릉시 율곡로3139번길 24
- 營業時間：09:00 - 18:00（售票時間至17:00）
- 票價：成人₩3,000、青少年及軍人₩2,000、小童₩1,000
去過江陵嘅人應該都有聽聞過烏竹軒，烏竹軒因為屋周圍種植深色竹子而得名，係朝鮮時代大學者栗谷李珥同母親申師任堂故居，亦係江陵地區最具代表性古蹟。如果大家有仔細睇上面張相，就會發現李珥同申師任堂分別係韓幣₩5,000同₩50,000紙鈔上嘅人物。
建於朝鮮時代早期烏竹軒，係韓國住宅中歷史最悠久嘅木製建築，亦因為建築史上重要性，喺1963年被指定爲寶物第165號。
申師任堂係朝鮮中期女性書畫家、作家、儒學者同詩人，係朝鮮歷史上良妻賢母典範。
李珥係李元秀同申師任堂第三個仔，係一位知名儒學家，因為對國政及教育頗有貢獻，被世人敬佩。
園區仲有之前李英愛同韓劇《申師任堂》劇組一齊嚟拍攝時留底嘅手印，除咗室外園區可以參觀之外，烏竹軒仲有好多市內展區可以了解當時歷史文化。
安木海邊（안목해변）
- 地址：강원 강릉시 창해로14번길 20-1
- 營業時間：每年7、8月06:00 - 22:00
安木海邊長500米，呢度除咗出名睇海之外，隔離仲有咖啡街，唔少遊客嚟到都會搵間Cafe坐吓之後望海。
呢度有好多海上活動等住大家可以體驗，另外仲有唔少人都會直接瞓喺沙灘上曬日光浴。
咖啡街相當熱鬧，有啲由朝早8點就會開門，嚟呢度食早餐都唔錯！
江陵Eomjine泥蚶拌飯 1號店（강릉엄지네꼬막집 1호점）
- 地址：강원 강릉시 남구길30번길 22
- 營業時間：11:00 - 23:00（堂食Last Order 22:00）
去到江陵必食嘅一定唔可以錯過Eomjine泥蚶拌飯！小編當日10:55去到，冇諗過已經超多人等緊！牆上仲有唔少藝人簽名，可想言知呢度人氣超高！
泥蚶拌飯（꼬막무침비빔밥）₩35,000
落完單之後，職員好快就會送上小菜同超大盤泥蚶拌飯，真係而家諗返起小編都流哂口水....好想再食！
拌飯裡面有螄蚶、韭菜、芝麻、蔥，加上辣椒粉同青陽辣椒，怕辣嘅朋友可以先拎走辣椒。
雖然佢唔係熱辣辣，係有啲偏涼口感，食第一啖可能會唔慣，但好彩係一啲腥味都冇，每一啖都食到麻油香，用紫菜包住食超上癮，好食到停唔到口！
江陵中央市場（강릉 중앙시장）
- 地址：강원 강릉시 금성로 21
- 營業時間：08:30 - 21:00
江陵中央市場好大，同江陵站好近，主要分為傳統市場同地下水產市場，分類區別鮮明，所以想搵啲咩都好易搵到。
芝士魚糕麵包（치즈 어묵고로케）₩2,500
小編叫咗鋪頭入面人氣口味之一嘅「芝士口味」，老闆仲特別建議要叮40秒，有拉絲會更好味！加入魚糕炸成麵包外皮大家有冇食過呢？酥脆口感入面仲有扎實魚糕粒，內餡包住香濃芝士，真係超好味，大家嚟到一定要試！
魷魚血腸（오징어순대）₩13,000
江陵中央市場另外一樣出名小食仲有「魷魚血腸」，周圍都有唔少鋪頭喺度賣緊（雖然束草中央市場（撳我）魷魚血腸都好出名）。
因為外型似血腸而被稱為「魷魚血腸」，但其實係將紅蘿蔔、洋蔥、冬粉等蔬菜塞入魷魚之後煮熟切片，當客人落單之後，會喺上面淋上蛋液，擺喺鐵板上煎成金黃色就可以食。
ARTE MUSEUM（아르떼뮤지엄）
- 地址：강원 강릉시 난설헌로 131
- 營業時間：10:00 - 20:00（最後入場19:00）
- 票價：成人₩17,000，青少年₩13,000，小學（8至13歲）₩10,000，幼稚園（4至7歲）₩8,000，嬰兒（36個月以下）免費
ARTE MUSEUM面積4,600平方米，係由廢棄音箱製造工廠改造而成，展內以數位影像、光影藝術打造出奇幻雨林、潮汐、瀑布等場景。
當中小編覺得最有趣嘅係，場內會提供畫紙等大家油顏色，之後放喺掃瞄機，大家製作嘅動物就會自動喺螢幕裡面，無論係小朋友定係大人都會玩得好盡興。
館內以大自然雷聲、星辰、森林、洞窟、陽光、草原為主題，利用光線同聲音打造出聲光饗宴，而且每個展館仲會散發出唔同香氣，令人身心都好舒服。
江陵鏡浦湖水公園（강릉경포호수공원）
- 地址：강원 강릉시 초당동 459-28
鏡浦湖因為好似鏡一樣清澈而命名，係冬季候鳥遷徙地之一。鏡浦湖中嘅岩石島（又稱鳥岩）上修建嘅亭中，聽講係掛住宋時烈題寫嘅「鳥岩」牌匾。
鏡浦湖另一邊可以望到Sky Bay Hotel倒映喺湖中。
由於呢度好大，唔少遊客會租雙人、四人單車暢遊鏡浦湖，吹住涼風一邊慢慢踩，好好享受江陵午後時光。
江陵草堂豆腐村（강릉 초당순두부마을）
- 地址：강원도 강릉시 초당순두부길 89-8
草堂豆腐村係江陵出名美食聚集地，第一間嫩豆腐餐廳喺1979年開張，之後就越開越多。
嘏泧堂（하월당）
- 地址：강원 강릉시 초당순두부길 89-12
- 營業時間：10:00 - 18:00（Break Time 15:30 - 16:00、Last Order 17:30）、週末10:00 - 19:00（Break Time 15:30- 16:10、Last Order 18:30）
豆腐海鮮麵（순두부차돌짬뽕）₩12,000
豆腐炸醬飯（순두부짜장밥）₩8,000
草堂豆腐村有過百間專賣豆腐海鮮麵店，而之前台灣Youtuber Fion都有推薦過「嘏泧堂」，呢間成日都需要排隊，而且唔俾提前預約，想知點解咁有人氣，之後就要去試吓啦！
SOON TOFU GELATO（순두부젤라또）
- 地址：강원 강릉시 초당순두부길 95-5
- 營業時間：10:00 - 19:30
豆腐雪糕（순두부젤라또）₩4,000
小編最後揀咗豆腐口味，有點似食緊豆腐花雪糕嘅感覺，甜而不膩，不過要講一個缺點，可能就係太細，食一個根本唔夠。 除咗豆腐口味之外，小編見到好多人會揀抹茶同黑芝麻口味，感覺都係人氣口味，大家之後都可以試吓！
Terarosa 江陵本店（테라로사 강릉본점）
- 地址：강원 강릉시 구정면 현천길 25
- 營業時間：09:00 - 21:00（Last Order 20:30）
Terarosa Coffee係韓國連鎖Cafe，總部同工廠位於江原道江陵市，喺首爾、楊平、釜山等地都有分店，烘焙來自世界各地優質咖啡豆而聞名。
檸檬芝士蛋糕（레몬 치즈 케이크）₩5,500
檸檬芝士蛋糕好香，每一啖都食到檸檬酸酸甜甜口感。
Colombia Jose Florez（콜콤비아 호세 츨로레즈）₩6,000
去到Terarosa Coffee本店一定要試吓佢哋嘅咖啡，好似呢款裡面由奇異果、杏仁果、山梅萃取而成，真係可以飲到水果清香。
House Juice（하우스주스）₩7,000
House Juice係每季都會變嘅飲品，呢次小編去到啱啱好係西瓜汁，最適合炎炎夏日飲返杯去消暑。
江原道江陵外國人的士
- 地址：강원 강릉시 용지로 176
- 營業時間：09:00 - 18:00
- 費用：3小時₩20,000（最多可以4個人搭）
如果睇完上面行程都覺得仲未夠，可以去埋BTS巴士站、注文津港等地方，如果想換行程或者加行程嘅話，喺出發前同司機商量就可以，3個鐘包車價只係₩20,000，呢個價錢嚟講真係超抵！
如果大家之後都想遠離市區，想搵個地方好好放鬆同休息，之後會唔會都考慮吓江陵呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
