Hello，大家好，我哋係由韓國人每日提供最新韓國旅行資訊嘅Creatrip。

經過多年籌備，意大利村（小木偶&達文西）終於喺2021年開幕，而家成為加平最新旅遊景點之一。佢就係喺小法國村隔離，要去相當方便，而家就等小編為大家詳細介紹一吓呢度有咩咁特別啦！

加平「意大利村」簡介

• 地址：경기 가평군 청평면 고성리 619-1
• 營業時間：09:00 - 18:00 
• 目前夜晚未有開放，詳細營業時間請參考官網
• 關閉時間可能會因季節同天氣而有所變化。

入場券票價：

*意大利村就係喺小法國村隔離。

• 所需時間：預計需2小時
• 注意事項：唔準帶寵物入場、禁止吸煙、免費泊車

加平「意大利村」介紹

意大利村係韓國唯一一間同Collodi基金會合作，將《木偶奇遇記》嘅小木偶形象化創造咗呢個主題公園，同時呢度亦係紀念偉大藝術家、工程師、科學家、建築師達文西作品嘅地方。

呢個地方超過30,000平方米，雖然2021年先開幕，但一直都好受歡迎，之前曾JTBC節目《개그맨 짝 시그널》都有嚟取景，加上喺小法國村隔離，一次過轉眼去到兩個國家都幾唔錯。  

而家售票處轉左去1號停車場附近，所以大家要沿着斜坡上去再行樓梯先會到。

不過喺度可以一次過買到先法國村同意大利村嘅入場券。

呢度有分兩個入口，左邊係去小法國村，右邊係去意大利村。

意大利村係以托斯卡納風格去建築，裡面有復古畫廊、天台、舞台等。

1. Giant Pinocchio Statue

地圖：2號

呢個係代表意大利村嘅雕像，同時係呢個個村莊嘅主角，佢高達10.8m，入去次前就會經過，係好多人嚟到會打卡位之一。

由高處可以俯瞰清平湖同小法國村，由呢度望落去真係超舒服。

2. Geppetto Alley

地圖：4號

Geppetto係創造小本偶嘅主人，呢條小巷超靚，可愛黃色同橙色建築，推薦大家一定要喺度影返幾張相。

過咗呢條街之後，右手邊會見到場內地圖同演出時間表，同時仲有好多古色古香畫廊，每入一間房就好似去了解一個故事咁。 

Negozio di Maschere

呢度有好多意大利面具，全部都唔同設計，相當壯觀。

戴嘅時候，有種好似要去一個貴族Party咁。

Antiquariato Milano

呢度展示好多古董，一入到去好多都係以金色打造，行嘅時候超擔心會唔小心掂到。 

大家可以自由參觀、影相但千祈唔好掂啊！

3. Piazza Da Vinci

地圖：8號

行完Geppetto Alley，之後就會到Piazza Da Vinci。

大家可以喺度同小木偶影相。

4. Pinocchio's Adventure Hall 

地圖：A區3樓

先由左邊睇呢度有一間賣紀念品嘅鋪頭同樓梯，不過好可惜，小編去嘅時候冇開，影唔到相俾大家睇。 

跟住樓梯上去會發現可以上到3樓小木偶冒險館。

呢度透過雕像、模型、繪畫再現小木偶嘅故事，嚟到好似返番去童年咁。

5. Pinocchio Observatory 

地圖：7號

喺同一層大樓，4樓係觀景台，呢度可以更高望到清平湖同和小法國村。

喺呢個角度睇，大家又覺唔覺得好似去咗意大利呢？

6. Da Vinci Exhibition Hall

地圖：B區B1、 B2

沿住地下藍色線就會去到達文西展覽館。

呢度展示咗好多達文西生前作品，特別係佢發明之一嘅飛機模型都再現。

唔少大家一定見過嘅作品，呢度都有。

JTBC

之前JTBC節目《개그맨 짝 시그널》就係喺小編同一個位取過景啦！

7. Outdoor Amphitheater

地圖：11號

呢度有一個超大戶外舞台，雖然小編當日去未有表演，不過行到攰坐喺度休息都品錯。

8. Pinocchio Clock Tower

地圖：14號

呢度係意大利村第二個天台，搭Lift只可以去到2樓，要行樓梯先去到4樓。

喺度可以欣賞到意大利村全景，自然風光同色彩繽紛建築值得上嚟一轉。

9. Tuscana Traditional House & The Village of Venice 

地圖：E、F 

呢個區域其實冇咩特別，但因為有五顏六色嘅屋，好適合喺度打卡。 

除咗上面小編介紹嘅景點之外，場內仲有好多畫廊、畫作、迷你車房等住大家去影，如果你係一個藝術愛好者，可能睇到唔知時間過。

意大利村體驗活動

*小編當時去係6月份，如果想知時間表有冇轉，可以參考官網。
*表演係免費

1. Pinocchio Theater

地圖：C

• 木偶表演
• 演出時間：12:00、15:00、16:30（16:30演出只限週末及公眾假期有）
• 時長：25分鐘

2. Vinci Corridor

地圖：10號

• 木偶表演
• 演出時間：11:20、14:00、16:00
• 時長：15分鐘

3. Piazza Da Vinci 

地圖：8號

• 氣球表演同木偶奇遇記
• 演出時間：14:30（只限週末及公眾假期開放）
• 時長：10分鐘

4. 集郵拎禮物

意大利村同小法國村一樣，場內有唔少印仔，大家一開始可以喺售票處買一本集郵小冊子（₩500） ，之後集齊超過5個郵票，就可以換到一張明信片。

意大利村美食/咖啡廳

意大利村裡面餐廳唔多，尤其係營業時間都唔固定，不過勝在價錢唔算貴。

1. chev'nour a' vinci

地圖：18號

營業時間：N/A

呢度有賣芝士燒肉汁薯條、牛排、熱狗，一份漢堡排只係₩12,000， 飲品₩6,000起，價錢唔算好貴。

2. Amore

地圖：12號

營業時間：N/A

呢間專門食西餐，Pizza ₩21,000起、意粉₩14,000起。 飲品₩4,000起，不過當日小編去作冇開門。

意大利村附近美食

如果想要多啲選擇可以出到去先食，不過因為疫情影響，好多舖頭都暫停開放或者執笠。

1. CU便利店

• 地址：경기 가평군 청평면 호반로 1063
• 營業時間：N/A
• 小Tips：小法國村後門對面

2. Zephyr Coffee（제퍼커피 가평고성리점）

• 地址：경기 가평군 청평면 호반로 1066
• 營業時間：07:00 - 00:00（可能會有變動）
• 小Tips：小法國村後門對面； CU便利店隔離

賣各種茶類同咖啡，價錢係₩3,000起。

3. 33辣炒年糕 清平雪岳店（33떡볶이 청평설악점）

• 地址：경기 가평군 청평면 호반로 1067
• 營業時間：10:00 - 20:00
• 小Tips：小法國村後門

主要賣炒年糕、紫菜包飯、血腸等，價錢係₩5,000起。

4. emart 24

• 地址：경기 가평군 청평면 호반로 1067
• 營業時間：08:00 - 22:00
• 小Tips：小法國村後門

5. Olive (올리브)

• 地址：경기 가평군 청평면 호반로 1067 2F
• 營業時間：10:00 - 22:00（Last Order 21:00）
• 小Tips：emart 24上面

如果想食正餐可以嚟Olive呢度食pizza或者意粉，餐廳好大，有分室內同室外。

小編之前食過呢度嘅PiGorgonzola Pizza（₩22,000）同Carbonara（₩17,000），兩款都好好味！

點樣去加平「意大利村」？

因為小法國村就係喺意大利村隔離，建議可以直接先去小法國村。

大家可以由加平站、清平站、清平巴士站，然後搭當地巴士去小法國村，但因為班次少，所以可以參考搭循環巴士，唔單止可以慳錢仲可以慳時間！

加平循環巴士

循環巴士只要買一張車飛就可以喺一日去哂南怡島、小法國村、意大利村、晨靜樹木園等主要旅遊景點。

循環巴士有分A Course同B Course，不過因為疫情影響，B Course目前暫停服務，A Course一日只係得兩架車營運中。

費用：成人₩8,000 / 青少年、小童、傷殘人士、軍人、老人家₩6,000、3歲以下免費。

詳情：可以參考官網

• 使用方法：上車嘅時候向司機買車飛（如果冇位要等下一架），之後會收到一張飛（如果要去其他地方全日都要keep住，之後每一次搭車嘅時候都要向司機出示。）
• 小Tips：大家只要認住粉紅色框標誌，喺前面等車就可以。

由首爾去意大利村

方法1：首爾→加平站→意大利村

由清涼里/龍山站搭ITX去到加平站。

由加平站搭當地巴士或循環巴士去小法國村，大約需要20-24分鐘。

• 12號車運行時間：07:00-18:30、班次：130分鐘一班。
• 循環巴士A Course：首班車09:20，尾班車17:20、班次：2小時一班

或者由加平站搭的士去意大利村：大約₩19,600，坐26分鐘。

方法2：首爾→清平巴士站→意大利村

由高速巴士客運站搭巴士去清平巴士站

• 價錢：₩5,200
• 出車時間：06:45、09:15、11:40、13:15、14:15、15:20、16:25、18:10、20:50

由清平巴士站坐當地巴士或循環巴士去意大利村，大約需要20分鐘。

• 30-5號巴士運行時間：06:20 - 20:00、班次：130分鐘一班。
• 循環巴士A Course：首班車08:30，尾班車17:30、班次：2小時一班

或者由清平巴士站搭的士去意大利村：大約₩25,900，坐33分鐘。

方法3：首爾→清平站→意大利村

由上鳳站搭地鐵去，或者由清涼里/龍山站搭ITX去到清平站。

由清平站搭循環A Course巴士去小法國村（意大利村），大約需要25分鐘，首班車：8:25，尾班車19:25，2小時一班車。

或者由清平站搭的士去意大利村：大約₩26,300，34分鐘。

2. 由南怡島去意大利村

搭循環A Course巴士去小法國村（意大利村），₩8,000， 坐大約25分鐘，首班車09:25，尾班車17:25，2小時一班車，或者搭的士₩28,500， 坐大37分鐘。

上車位置：Starbucks對面，認住粉紅色框標誌。

3. 由意大利村返首爾

方法1：意大利村→加平站→首爾

由小法國村（意大利村）搭循環A Course巴士去到加平站（₩8,000，大約30分鐘），首班車08:50，尾班車17:50，2小時一班，或搭的士（₩23,100，大約31分鐘）。

由加平站搭ITX去清涼里/龍山站。

方法2：意大利村→清平巴士站→首爾

由意大利村站搭的士（₩16,800，21分鐘）或坐當地巴士或循環巴士到清平日巴士站（終點站），大約需要20分鐘。

• 30-5號巴士：06:50 - 20:30、班次：130分鐘一班。
• 循環巴士A Course：首班車09:50，尾班車17:50、班次：2小時一班

由清平巴士站搭巴士到高速巴士客運站。

• 價錢：₩5,200
• 出車時間：07:25、09:20、09:50、10:50、12:50、13:50、15:50、18:00、21:10

方法3：意大利村→清平站→首爾

搭的士（₩17,400，22分鐘）或搭循環A Course巴士到清平站，約25分鐘，首班車 11:00，尾班車19:00，2小時一班車。

由清平站搭地鐵去上鳳站，或者由清平站搭ITX去到清涼里/龍山站。

以上係自由行嘅方式俾大家參考，有興趣嘅朋友都可以參考我哋嘅一日遊團：

• 南怡島+小法國村+意大利村一日遊（撳我）
• 南怡島+小法國村+意大利村+鐵道單車（撳我）
• 南怡島+小法國村+意大利村+晨靜樹木園一日遊（撳我）
• 南怡島 + 小法國村 + 意大利村 + 鐵路單車 + 晨靜樹木園一日遊（撳我）
• The Painters塗鴉秀 & 首爾近郊一日遊（南怡島、小法國村、意大利村）（撳我）

另外加平、春川仲有好多景點等住大家，例如：童話瑞士村、小法國村、Lego Land、晨靜樹木園、南怡島等，有興趣嘅朋友都可以去睇埋我哋嘅介紹。

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面 

 韓國代購