The Hyundai Seoul總整理
2021年先開幕嘅「The Hyundai Seoul」到底有咩行？同其他地方比有咩唔同？
Hello，大家好，我哋係由韓國人每日提供最新韓國旅行資訊嘅Creatrip。
「The Hyundai Seoul」現代百貨喺2021年開幕，呢度由開幕以嚟一直都成為熱話！加上呢度係旗艦店，唔少韓國潮牌都可以喺度買到，今日小編就同大家介紹呢度有咩特別啦！
The Hyundai Seoul簡介
- 地址：서울 영등포구 여의대로 108
- 營業時間：星期一至四 10:30 - 20:00、星期五至日 10:30 - 20:30、6樓美食街10:30 - 22:00
- 官網：撳我
The Hyundai Seoul 介紹
The Hyundai Seoul好大，由B2至6樓係購物中心，B3至B6係停車場。
1/F：Exclusive Label
The Hyundai Seoul 1樓會見到好多世界各地名牌聚集，好似有Gucci、Balenciaga、Gentle Monster等。
一樓總共有5個入口，由汝夷島站行去The Hyundai Seoul時，4號門係最近。
由4號門口入去會見到一個「瀑布花園」，呢個係The Hyundai Seoul 代表打卡地點之一，嚟到會有一種好舒服同Healing嘅感覺。
2/F：Modern Mood
2樓主要銷售海外時尚品牌、雜貨同生活用品，好多品牌喺其他百貨公司都冇見過，有興趣嘅朋友可以睇吓。
3/F：About Fashion
3樓主要銷售男裝、女裝、鞋、雜貨同太陽鏡，好似LACOSTE、BEAN POLE、Tommy Hilfiger等知名品牌都喺度。
4/F：Life&Balance
由New Balance Mega Shops到高爾夫球等運動相關商品都可以喺度搵到，同時呢度仲有賣一啲家居用品。
5/F：Sounds Forest
The Hyundai Seoul 5樓亮點係Sounds Forest，喺商場入面種滿好多植物。
大家可以坐喺長櫈打卡或者買杯咖啡嘆吓，好似置身喺公園咁放鬆緊。
另外呢度仲有好多童裝店、電器鋪同快閃店等。
6/F：Dining&Art
6樓有高級餐廳、展覽室同綜合文化空間。
B1/F：Tasty Seoul
呢層可以話係最多人嘅一層，有美食廣場、Cafe等，唔少人行到攰都會喺度食飯。
B2/F：Creative Ground
B2樓有賣運動、生活方式、雜貨、SPA品牌，所有鋪頭都深受年輕一代歡迎，呢層連住汝夷島站，非常方便。
想知道每一層有咩可以參考商場嘅機器（右下角可以改英文），或者場內小冊子。
「The Hyundai Seoul」推薦美食
1. 美食廣場 (B1)
美食廣場可以用相對較平嘅價錢食到唔少美食，最特別嘅係好多餐廳都喺麵包車上面。
美食廣場入口有落單機（只可以碌卡），或者可以喺中間櫃檯落單（俾現金）。
最後小編喺度試咗全州石頭拌飯（₩9,500）同五花肉套餐（₩13,000），想食韓國經典料理嚟呢度就冇錯啦！
為咗衛生安全，中間仲會有洗手檯，唔使突登搵廁所。
不過提提大家：食完之後記得要去自助還餐啊！
2. SMT LOUNGE（6F）
6樓SMT Lounge係SM Entertainment經營嘅餐廳，以「墨西哥城唐人街」為主題，主要賣售香港同墨西哥美食，價格偏高，麻辣燙麵₩15,000、小籠包（4粒）₩10,000、炸粟米餅₩12,000。
如果坐喺窗邊仲可以欣賞到汝夷島城市風光。
3. Laurus Blanc（3F）
Laurus Blanc喺一間專食Brunch嘅餐廳，味道仲要幾唔錯。
望出去仲可以見到唔少植物圍住，相當寫意。
呢度有賣好多湯類、多士、三文治同唔少甜品。
小編係喺2022年5月去，當季甜品係士多啤梨撻（₩9,000），濃郁口感同酥脆感，真係超好味！可麗露 (₩3,500) 係一種外苦內甜嘅甜品。Jardin Bleu Iced Milk Tea(₩9,000) 推薦俾鍾意俾飲甜香奶茶嘅朋友，美式咖啡係一種略帶酸味嘅咖啡，口感清爽。
4. Cafe Layered（B1）
Cafe Layered喺韓國超受歡迎，本身只係喺延南洞同安國搵到，而家就連The Hyundai Seoul都可以搵到佢嘅蹤影。
呢度嘅鬆餅好出名，價錢大約係₩4,500至₩5,500、蛋糕₩7,500至₩8,500、美式咖啡₩5,000，雖然鋪頭唔算大，但都一樣可以食到唔少甜品同影靚相。
5. Blue Bottle（5F）
Blue Bottle喺5樓Sound Forest中央，美式咖啡大約₩5,200、鮮奶咖啡約₩6,400同鬆餅大約係₩6,300。
其他推薦鋪頭
1. NICE WEATHER
NICE WEATHER係一間超受年輕人歡迎嘅鋪頭，以便利店為概念，銷售食品、飲品、服裝、雜貨等。
鋪頭最受歡迎嘅係OLD FERRY DONUT，價錢由₩2,900到₩5,000不等，冬甩內餡有超多忌廉，大人同細路都會鍾意，每日由晏晝1點左右開始發售，通常一個鐘就會賣哂，小編大約12:50左右到，店外已經有唔少人排緊隊，有興趣嘅朋友可能早啲去會更好。
2. 快閃店&展覽
小編5月去嘅時候咁啱遇到高級茶品牌「creamchaa」同女仔應該都唔陌生嘅「ZIGZAG」開pop-up store，現場參加活動仲可以有小禮物添啊。
6樓設有免費或付費展覽區，不過大部分需要提前預約，建議大家先參考官網公佈展覽時間。
便利設施
1. 店鋪等候方法
The Hyundai Seoul每間餐廳入口都有一部機器，如果有韓國手機號碼，只需要喺左下角輸入電話號碼同人數就可以，如果冇手機號碼，可以喺機器上掃QR Code Download 現代美食博物館App去等位。
2. 儲物櫃
The Hyundai Seoul總共有3個免費儲物櫃可以用，地下1樓客服辦公室隔離、Camel Coffee隔離同地下3樓停車場中央自動扶梯隔離，除咗可以有韓文之外，仲有日文、英文同中文等語言服務。
當中最特別嘅係客服中心旁隔離嘅儲物櫃，唔單止可以放常溫同冷藏食物＋大件行李箱等，雖然只限當日可以用，但有咗佢真係真係方便好多，Shopping都輕鬆好多。
3. 服務中心
由1號門入去就可以見到正中間有服務中心，關於任何資訊，都可以嚟呢度問職員。
6樓設有服務休息室，呢度仲可以退稅，如果對於退稅有任何疑問，可以撳我了解更多。
4. 洗手間
基本上每一層都會有洗手間，不過建議大家盡量避開1樓，因為人超多。
5. 出租BB車
1樓同5樓有租BB車嘅服務，同時5樓仲有一間嬰兒休息室，有帶小朋友去嘅話，可以嚟短暫休息。
6. 租用叉電器
B1樓客服中心隔離同儲物櫃隔離有得租叉電器，不過只可以用KakaoPay或韓國信用卡俾錢。
7. 租單車
韓國越嚟越多人會踩單車代替行路，就連外國人都可以用，有興趣嘅朋友可以撳我了解更多。
「The Hyundai Seoul」附近景點
1. 汝矣島漢江公園
講到韓國要去野餐，一定會去汝矣島漢江公園，由The Hyundai Seoul 4號出口行過去都只係5分鐘。
- 地址：서울 영등포구 여의도동 330
- 小Tips：汝矣渡口站2號出口行1分鐘
2. IFC MALL
IFC MALL就係喺The Hyundai Seoul隔離，商場地下1至3樓，有唔少時裝店、SPA品牌、書店、CGV戲院、餐廳等，地下2樓仲有一間超人氣韓式冬甩Cafe「Knotted」，有興趣嘅朋友可以去睇吓。
- 地址：서울 영등포구 국제금융로 10
- 營業時間：10:00 - 22:00（每間鋪頭都會唔一樣）
- 小Tips：汝矣島站3番出口行大約7分鐘
3. 63大樓海洋世界水族館
63大樓海洋世界水族館唔少韓劇都嚟過取景，例如《藍色海洋的傳說》等，呢度每日有超過九場免費美人魚表演，係嚟到一定唔可以錯過嘅表演之一，相信大人同小朋友一定都會好鍾意。
- 地址：서울 영등포구 63로 50
- 營業時間：10:00 - 19:30
點樣去The Hyundai Seoul？
1. 由汝矣島站出發
由汝矣島站3號出口方向行。
3號出嚟之後唔好出去，沿住扶手電扶右邊地下道行，跟住就會見到往The Hyundai Seoul指標。
繼續沿住扶手電梯直行後轉右。
途中左邊會見到IFC購物中心入口，但需要繼續直行。
大約行10分鐘左右，就會見到B2樓係The Hyundai Seoul入口。
2. 由汝矣渡口站出發
由汝矣渡口站1號出口出嚟。
出嚟之後往右後直行。
大約行5分鐘左右，就會見到The Hyundai Seoul。
以上係2023年最新The Hyundai Seoul嘅介紹，希望可以幫到之後會計劃去嘅朋友啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
