仁川「永宗島」附近景點推薦
仁川「永宗島」附近景點推薦！喺仙女岩面前許願可能會夢想成真？
Hello，大家好，我哋係由韓國人每日提供最新韓國旅行資訊嘅Creatrip。
大家去旅行嘅取向係鍾意日日shopping，定係親親大自然了解當地歷史呢？如果大家本身對歷史有興趣，今日小編介紹嘅呢個仁川「永宗島」，話唔定會啱你！仁川唔再只係得機場！嗰度有好多嘢等着大家去發掘㗎！
仁川「永宗島」景點推薦
1. 王山Marina遊艇競技場（왕산마리나 요트경기장）
- 地址：인천 중구 왕산마리나길 143
- 網址：預約撳我
喺永宗島西北方嘅王山係一個享受悠閒漁村風光嘅地方，呢度人唔算多，想靜靜地嚟休息就啱哂！不過佢有一個缺點係交通唔算好方便。
今日要介紹嘅係遊艇競技場，除咗有一般俾遊客坐嘅遊艇觀光之外，同時仲有提供專業玩家考牌照、競賽、保養同停泊遊艇。
如果想搭遊艇遊西海可以事先喺網上預約或現場預約，最少要兩個人先可以預約，一次40分鐘，每人₩30,000。
不過提提大家，呢度最近嘅巴士站至少要行40分鐘，而且唔係好容易截的士，所以大家如果去之前，最好先確認交通方式。
2. 仙女岩海水浴場（선녀바위해수욕장）
- 地址：인천 중구 을왕동 678-188
小編原本以為西海岸只係得泥灘，冇諗過仙女岩海水浴場上都有好多奇岩怪石，更有一個貌似仙女岩石聳立喺海灘上，成為呢度嘅地標。
聽講以前率領永宗鎮水軍嘅護軍同妻子感情破裂之後，妻子喺叫做太平岩嘅岩石上投身大海，因為冇人幫佢收屍，屍體就漂流喺龍遊島港口，護軍後嚟覺得後悔，就幫佢埋屍。而妻子投身嘅太平岩就係而家見到嘅仙女岩，因為岩石形象有啲似係女人喺度祈禱咁，所以有人講過喺岩石前面許願，會夢想成真。
雖然仙女岩背後故事有啲悲傷，不過因為有咁嘅故事，令到呢度望落去更加有意義。
3. 永宗島海邊鐵路自行車（영종씨사이드 레일바이크）
- 地址：인천 중구 구읍로 75 씨사이드 레일바이크 관리사무실
- 時間：3月至10月09:00 - 18:00、11至2月10:00 - 17:00
「永宗島海邊鐵道自行車」係離首爾最近嘅鐵道自行車，來回5.6公里， 大約可以踩1個鐘，坡度平緩，所以踩嘅時候都唔會太吃力。
大家可以見到呢條長龍，真係唔講得笑，人氣相當高！
沿途可以望到景觀瀑布、雕塑作品，全程欣賞海岸線、對岸嘅月尾島，以及仁川大橋，途中仲會有大叔幫大家影相同賣紀念照片。
如果想搵個地方可以邊放鬆心情邊望大海，嚟踩自行車都係一個唔錯嘅選擇，特別係黃昏時踩，心情都特別好！
4. 永宗 天空都市24號綠公園（영종 하늘도시24호근린공원）
- 地址：인천 중구 구읍로 63
永宗島東邊有好多綠化公園，當中小編想同大家介紹位於永宗歷史館附近嘅「 24號綠公園」。
「24號綠公園」就係喺鐵路自行車同永宗歷史館附近，係永宗島上所有公園中最有人氣之一，呢度除咗多植物可以欣賞之外，仲可以望到大海，邊散步邊散心。
企喺太平樓二樓可以望到仁川大橋同月尾島成個景色，可以欣賞到自然風光之如，同時亦保留咗唔少歷史足跡。
5. 舊邑碼頭（구읍뱃터）
- 地址：인천 중구 중산동 1948-3
舊邑碼頭離地鐵永宗站唔遠，係最近韓國SNS上好多年輕人意去打卡景點之一，呢度可以食到新鮮海鮮，夜景嚟影相更加係一流！
喺永宗大橋建成之前，舊邑碼頭係唯一通往仁川水道，曾經繁榮嘅碼頭亦因為大橋開通後逐漸沒落，轉變成觀光商圈。
舊邑碼頭由下晝開始就好熱鬧，因為呢度有好多Cafe同遊樂設施（有啲似月尾島），夜晚可以去食生魚片、烤貝、炸蝦等海鮮餐廳。
仁川唔再只係得機場，其實附近仲有好附景點，大家可以去觀光，之後有時間，大家會唔會都想去玩轉呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
