春川咖啡廳｜馬鈴薯田咖啡廳
春川竟然有一間以薯仔做主題嘅Cafe！視覺同味道一樣都好正！
Hello，大家好，我哋係由韓國人每日提供最新韓國旅行資訊嘅Creatrip。
喺韓國，江原道係出名出產薯仔，今日想同大家介紹一間以薯仔做主題，專賣薯仔麵包同埋飲品嘅Cafe。佢哋嘅麵包好有咬口，而且甜甜地，喺韓國超人氣，甚至仲可以郵寄去韓國全國！落完單之後出去會見到一個花園，好似轉眼間去咗童話故事之中，無論係睇景定係味道都超好，而家就等我哋一齊睇落去啦！
春川「馬鈴薯田咖啡廳」資訊
- 地址：신샘밭로 674 신북읍 춘천시 강원도
- 營業時間：每日 10:00 - 19:00 （有可能會變）
春川「馬鈴薯田咖啡廳」推薦理由
- 呢度嘅飲品同麵包都超好食，特別係黑豆鮮奶咖啡同埋原味薯仔麵包。
- 佢哋有招牌卡通人物叫做「포떼또」(Potato），舖頭入面裝修成日會見到佢嘅出現，甚至仲有佢嘅週邊產品賣。
- 喺1樓有好多種唔同種類嘅花，會根據季節去變，而且仲有戶外座位。
- 喺2樓可以望到昭陽江，座位夠闊落，而且有太陽射入嚟超舒服。
- 用嘅係100%國內薯仔泥，食嘅時候會特別覺得軟腍腍。
春川「馬鈴薯田咖啡廳」優惠
- 埋單嘅時候向職員出示優惠券，即可享飲品九折優惠。
- 唔需要預約。
- 如果用coupon嘅時候，有任何疑問都可以send email到help@creatrip.com。
春川「馬鈴薯田咖啡廳」注意事項
- 薯仔麵包唔適用於優惠券。
- 因為只會用當造水果同蔬菜，所以唔同季節都會有變。
春川「馬鈴薯田咖啡廳」前往方法
地址：신샘밭로 674 신북읍 춘천시 강원도
1. 搭巴士
喺首爾龍山站或清涼里站搭ITX火車去到春川，喺春川1號出口出嚟之後過馬路轉左直行有一個巴士站。
可以搭11號或12號巴士，喺上泉初等學校站（상천초등학교）落車，之後往右一直行就會見到超可愛嘅薯仔公仔，搭巴士大約係坐30分鐘。
2. 搭的士
喺春川站1號出口出嚟之後即刻有一個的士站，去到Cafe大約坐20分鐘，價錢大約₩10,000左右。
春川「馬鈴薯田咖啡廳」介紹
一去到喺門口就會見到呢一個超可愛嘅薯仔公仔，唔知係咪因為外牆用咗類似稻草去裝修，感覺就好似去咗農村咁，同Cafe嘅Concept好夾。
一入到去就會見到著住制服嘅職員喺度整緊飲品，只要叫某種飲品就可以得到呢個可愛薯仔杯套，甚至會隨住唔同季節都會有所變化，而家嘅圖案係戴住帽同手套，係唔係好可愛呢？
Cafe入面有好多同薯仔有關嘅細節，唔同角落仲會有隱藏其他薯仔，大家要細心留意啊！
甚至仲會有好多同薯仔有關嘅週邊，當時小編去到嘅就有賣T-Shirt、百潔布、香薰、帆布袋、MT膠紙，小編特別鍾意佢哋嘅帆布袋，另外佢哋嘅香薰係同咗出名香水品牌「Demeter」合作，係泥土香，雖然有啲嚇親不過都幾香
薯仔麵包主要分咗原味、芝士同咖哩口味，每一款都係₩3,300，只要同職員講想要幾多個同咩口味，佢哋就會幫大家放到落個盤度，然後去到收銀處買埋飲品就可以。
落完單之後小編走過去出去花園，當日天氣好好出面仲有戶外座位，係咪睇到都覺得好靚呢？不過因為週末好多人去，所以想坐到靚位有啲難，建議可以平日去。
只有一到夜晚就會開呢啲波波燈，完全係另一個feel。
坐低仲可以望到昭陽江風景。
一上到2樓就會見到呢個Photomatic，最近喺韓國相當流行影呢啲自拍照，因為係同Cafe合作，相框會特別唔同，千祈唔好錯過啦！
呢度就係Cafe嘅2樓，係咪同1樓好唔同呢？呢度就好似一間房咁，甚至仲有埋箍臣，喺度休息非常之唔錯，加上有一個咁大嘅玻璃窗，可以望到好遠嘅地方。
因為聽過好多人都推介，所以令到小編更加期待！而家就等小編為大家逐一介紹啦。
原味薯仔麵包（오리지널 감자빵）₩3,300
第一個就係佢哋嘅原味薯仔麵包，一開始以為外皮會好硬，點知切嘅時候發現原來咁軟熟，因為原來佢哋唔係用麵粉做而係用咗米粉。裏面嘅餡用咗國內產嘅「로즈감자」（玫瑰薯仔），所以食落會更加甜同埋更加軟熟。而家諗返起都好想再食。
芝士薯仔麵包（치즈 감자빵）₩3,800
芝士薯仔麵包入面加咗香芹，呢個組合真係超完美！ 裏面嘅餡超多芝士！總共用咗莫札瑞拉芝士、高達芝士、車打芝士同卡芒貝爾芝士。
黑豆鮮奶咖啡（서리태라떼）₩5,500
呢杯黑豆鮮奶咖啡真係超好飲，豆味好濃，唔會太甜，相信大家都會鍾意飲。
薯仔鮮奶咖啡（감자라떼）₩6,000
如果平時飲開忌廉鮮奶咖啡覺得有啲厭，不妨可以試吓呢個薯仔鮮奶咖啡，同薯仔麵包一齊食好夾！
因為呢度嘅原味薯仔麵包真係太好食！令到小編都忍唔住買返盒！
如果大家之後有計劃去江原道旅行，千祈唔好唔記得呢一間馬鈴薯田咖啡廳，相信大家去到一定會好滿足！
春川「馬鈴薯田咖啡廳」菜單
| 飲品 | 價格 |
| 美式咖啡（아메리카노） | ₩4,300 |
| 鮮奶咖啡（카페라떼） | ₩4,800 |
| 薯仔鮮奶咖啡（감자라떼） | ₩6,000 |
| 黑豆鮮奶咖啡（서리태라떼） | ₩5,500 |
麵包 | 價格 |
原味薯仔麵包（오리지널 감자빵） | ₩3,300 |
芝士薯仔麵包（치즈 감자빵） | ₩3,800 |
點先可以享有春川「馬鈴薯田咖啡廳」優惠呢？
以上係春川「馬鈴薯田咖啡廳」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
