Hello，大家好，我哋係由韓國人每日提供最新韓國旅行資訊嘅Creatrip。
2025年米芝蓮指南（THE MICHELIN GUIDE）中，韓國有好多餐廳都上咗榜！不過講起米芝蓮餐廳，通常價位都會比較貴... 為咗幫大家護一護個荷包，今日小編就幫大家整理咗首爾地區嘅Bib Gourmand（必比登推介）*餐廳，唔知有幾多間大家係去過嘅呢？
*必比登推介 = 價格大眾化但仍然提供高品質美食嘅餐廳，平均消費金額為₩45,000（45000）
2025首爾米芝蓮必比登推介餐廳
明洞 | 明洞餃子(명동교자)
- 總店地址：서울 중구 명동10길 29
- 新館（明洞站店）：서울 중구 퇴계로 129
- 營業時間：10:30 - 21:00
「明洞餃子」係一間有接近60年歷史嘅刀削麵專門店，雖然只有4款嘢食，但係每日都吸引到超多人嚟幫襯！呢度經常都要排隊，不過因為通常大家好快就會食完走，所以唔需要等太耐就可以入到去。本身明洞有兩間分店，不過而家其中一間裝修緊，然後再喺附近開咗一間幾層樓高嘅分店！
小編建議大家嚟到一定要叫刀削麵+餃子，呢度嘅刀削麵偏腍，湯底亦都非常濃郁，加埋香口嘅炒肉碎，無論係男女老少都會鍾意！呢度嘅泡菜都好出名，超啱用嚟解膩，不過因為蒜頭味偏重，所以相對上會偏辣！
明洞附近仲有咩好嘢食？👇🏻
[블로그] 明洞美食總整理
明洞 | 河東館(하동관)
- 明洞總店地址：서울 중구 명동9길 12
- 營業時間：星期一至六 07:00 - 16:00
- 前往方法：乙支路入口站（을지로입구역）5號出口行4分鐘
河東館係一間湯飯老字號，由1939年開始喺明洞營業至今！平時諗起韓國湯飯都係用黑色石鍋裝住，然後湯底通常都係白色，不過河東館嘅湯飯湯底係透明㗎！
睇落好似冇味咁，但係味道夠濃，食落比起一般湯飯更加清淡同爽口，而且配料同肉都好足料！不過大家要注意呢度只要賣曬就會提早收鋪，想食記住要早啲去！另外河東館喺汝矣島同COEX都有分店，大家如果有機會經過嘅話記住去試！
藥水 | 金豬食堂(금돼지식당)
- 地址：서울 중구 다산로 149
- 營業時間：11:30 - 23:00（Last Order 22:15）
- 前往方法：藥水站（약수역）2號出口行3分鐘
네이버 플레이스
見到「金豬食堂」呢個名就知道呢間餐廳係專賣韓燒㗎啦！呢間燒肉鋪已經連續幾年入選必比登推介餐廳，好多韓國明星，甚至係BTS都會專程嚟食！「金豬食堂」由朝早10:30開始可以攞籌，11:30開始可以入座。不過因為呢度無論係平日定weekend都超多人排隊，所以大家可以先攞定籌排隊，然後去附近Cafe坐住等！
嚟到「金豬食堂」必食嘅係五花肉同梅花肉！呢度嘅豬肉比起其他餐廳口感更加好，而且油花分佈得好靚又juicy~而呢度最特別嘅係居然有羅勒葉賣，俾大家用嚟代替生菜包住豬肉食，羅勒香同香口嘅豬肉會相輔相成，喺其他地方一定食唔到呢種味！而且呢度嘅職員會由頭到尾幫大家用炭火燒肉，保證大家可以食到最juicy最嫩滑嘅肉~
「金豬食堂」真實食評👇🏻
[블로그] 新堂洞「金豬食堂」介紹
明洞/鐘路仲有呢幾間餐廳入選！
大成家(대성집) 牛膝骨湯 |
 |
湧金屋(용금옥) 牛鰍魚湯 |
 |
開城餃子「宮」(개성만두 궁) 餃子 |
 |
又來屋(우래옥) 平壤冷麵 |
 |
富村生牛肉(부촌육회) 生牛肉 |
 |
紫霞手工水餃(자하 손만두) 餃子 |
 |
真中牛肉麵館(진중 우육면관) 牛肉麵 |
 |
其他相關文章👇🏻
[블로그] 明洞美食總整理
聖水 | 陵洞水芹菜(능동미나리)
- 地址：서울 성동구 연무장길 42
- 營業時間：10:00-02:00
- 前往方法：聖水站（성수역）4號出口行4分鐘
「陵洞水芹菜」小編第一次去就已經愛上，呢度顧名思義專賣水芹菜料理，本身就好食嘅拌飯同牛腸鍋加埋香氣十足嘅水芹菜真係比想像中夾！不過缺點係價錢比較貴，而且一定要提早去排隊，如果唔係就要等好耐！
聖水 | 雞月(계월)
- 地址：서울 성동구 성덕정3길 8
- 營業時間：11:00-21:00（Break Time 15:00-17:00）
- 前往方法：首爾林站（서울숲역）2號出口行9分鐘
通常諗起湯飯都係豬肉或者雪濃湯，不過「雞月」賣嘅係超清嘅雞肉湯飯，因為完全唔油膩，再加上鮮甜白菜，令唔少客人都食過返尋味！
聖水/建大仲有呢幾間餐廳入選！
MATDOL(맷돌) 墨西哥菜 |
 |
FAGP(팩피) 意大利粉 |
 |
情麵(정면) 麵類 |
 |
其他相關文章👇🏻
[블로그] 2025首爾聖水美食總整理
合井 | 屋同食(옥동식)
- 地址：서울 마포구 양화로7길 44-10
- 營業時間：
- 星期一至五 11:00 - 22:00 (Break Time 15:00 - 17:00)
- 星期六至日 11:00 - 21:00
- 前往方法：合井站（합정역）2號出口行4分鐘
位於合井嘅「屋同食」賣嘅係豬肉湯飯！不過同平時見到嘅豬肉湯飯唔同嘅地方在於，呢度嘅湯唔係奶白色嘅湯，反而係超清嘅豬骨湯。而且豬肉湯飯每日限定100碗，賣完就會收鋪，所以如果有興趣嘅話，建議大家午飯時間去。
平時去食湯飯通常都會飯同湯分開上，不過呢度會直接幫你將飯放落湯度上。可能有朋友會因為覺得豬肉湯飯有一種豬特有嘅味所以唔鍾意食，不過呢度完全唔會有豬肉腥味！不過要注意，因為餐廳比較狹小，所以如果排到10幾號嘅話通常都要等50分鐘左右先可以入到去，不過小編覺得呢個味道值得排咁耐！
麻浦 | 黃金豆田(황금콩밭)
- 地址：서울 마포구 마포대로16길 9
- 營業時間：
- 星期一至五 11:30 - 21:30（Break Time 15:00 - 17:00）
- 星期六及日 11:00 - 21:00（Break Time 15:00 - 17:00）
- 前往方法：兒嶺站（애오개역）4號出口行4分鐘
麻浦呢間「黃金豆田」，顧名思義係一間豆類製品專門店，呢度嘅豆腐超出名，最近更加上埋電視，人氣大增！
現代人平時食飯都超濃味同重味精，但係如果話太清淡大家又未必會覺得好食，不過呢度嘅各種豆腐料理都可以令客人食得滋味之餘夠健康！而且「黃金豆田」就位於香港人最愛醬油蟹餐廳真味食堂附近，有興趣不妨可以book定枱去！
合井/弘大仲有呢幾間餐廳入選！
ORENO拉麵(오레노라멘) 日式拉麵 |
 |
津津(진진) 中菜 ※《黑白大廚》參賽者主理餐廳 |
 |
Damtaek(담택) 日式鹽味拉麵 |
 |
西橋卵麵坊(서교난면방) 麵類 |
 |
味必淡(미필담) 北韓料理 |
 |
兄弟家(교다이야) 烏冬 |
 |
base is nice(베이스 이즈 나이스) 素食韓國菜 |
 |
Nishimura拉麵(니시무라멘) 日式拉麵 |
 |
TUKTUK NOODLE THAI(툭툭누들타이) 泰國菜 |
 |
Sarukame(사루카메) 日式拉麵 |
 |
麻浦屋(마포옥) 雪濃湯 |
 |
站前會館(역전회관) 韓式烤牛肉 |
 |
合井屋(합정옥) 牛骨湯飯 |
 |
其他相關文章👇🏻
[블로그] 弘大美食總整理
汝矣島 | 花蟹堂(화해당)
- 地址：서울 영등포구 국회대로62길 15
- 營業時間：
- 星期二至六 11:00 - 21:00（Break Time 15:00 - 17:00）
- 前往方法：國會議事堂站（국회의사당역）6號出口行6分鐘
除咗真味食堂同大瓦房，另一間最多香港人去嘅醬油蟹餐廳就係位於汝矣島嘅「花蟹堂」，今年更加係呢三間之中唯一一間被選定為米芝蓮餐廳嘅醬油蟹專門店！
呢度價位雖然唔低，不過勝在醬油蟹夠高質超鮮甜，而且仲有超多配菜，好味得嚟夠飽肚。雖然呢度唔單止係外國人，連韓國人自己都會提早book枱預約，如果唔係就有可能食唔到！
「花蟹堂」真實食評👇🏻
[블로그] 汝矣島美食 | 花蟹堂
Book定「花蟹堂」食米芝蓮級醬油蟹啦👇🏻
[스팟] 花蟹堂（汝矣島店）代客預約服務
新沙 | Ggupdang(꿉당)
- 地址：서울 서초구 강남대로 615
- 營業時間：
- 星期一至五 15:00 - 22:50
- 星期六至日 14:00 - 22:50
- 前往方法：新沙站（신사역）5號出口行1分鐘
「Ggupdang」係間韓燒專門店，呢度賣嘅豬梅花肉全部都經過15日熟成，然後由經驗豐富嘅職員用定制嘅鐵板嚟燒，鎖住豐富肉汁！狎鷗亭店由1點開始可以攞籌排隊，建議大家可以攞定飛然後去附近Cafe邊坐邊等，亦都有聖水同蠶室分店。
呢度嘅招牌Menu叫KOKUMI梅花肉，KOKUMI係日文嘅KOKU（豐富）同MI（味道）嘅合成詞，寓意呢款肉比一般梅花肉味道更加濃郁，而且肉質更加嫩滑。
狎鷗亭 | 餃子家(만두집)
- 地址：서울 강남구 압구정로 338
- 營業時間：星期一至六 12:00 - 20:00（Break Time 15:00-17:30）
- 前往方法：狎鷗亭羅德奧站（압구정로데오역）6號出口行2分鐘
雖然大家平時未必會去專登去食餃子，不過「餃子家」嘅水餃同平時喺韓國食到嘅真係唔同！
可能大家覺得餃子要皮薄餡靚先叫好食，呢度嘅水餃皮偏厚，不過完全唔會有麵粉味，反而會令人覺得夠飽肚，加埋濃郁嘅湯底真係夠曬warm！如果兩個人嚟，小編推薦大家可以叫半半煎餅（辣椒煎餅+綠豆煎餅）加一碗餃子湯，咁就可以一次過試曬咁多款嘢食啦！
江南/狎鷗亭/新沙仲有呢幾間餐廳入選！
GEBANG SIKDANG(게방식당) 醬油蟹 |
 |
襄陽蕎麥冷麵(양양 메밀 막국수) 蕎麥冷麵 |
 |
貞麟麵屋(정인면옥) 冷麵 |
 |
| 麵首爾(면서울) 麵類 ※《黑白大廚》參賽者主理餐廳 |
 |
| 林炳周山東刀削麵(임병주 산동 칼국수) 麵類 |
 |
| GOMTANGLAB(곰탕랩) 牛骨湯 |
 |
| 炫烏冬(현우동) 烏冬 |
 |
其他地區入選餐廳
新村 | Tasty Cube(정육면체) 擔擔麵 | 光化門 | 美進(미진) 蕎麥麵 |
北村 | 安岩(안암) 豬肉湯飯 | 光化門 | 光化門湯飯(광화문 국밥) 豬肉湯飯 |
市廳 | 滿足五香豬腳(만족오향족발) 豬腳 | 光化門 | 奶奶家(할매집) 豬腳 |
市廳 | 儒林麵館(유림면) 蕎麥麵 | 光化門 | 黃生家刀削麵(황생가 칼국수) 麵類 |
忠武路 | 筆洞麵屋(필동면옥) 平壤冷麵 | 仁寺洞 | 花開在飯上(꽃밥에피다) 韓國料理 |
三清洞 | 三清洞麵疙瘩(삼청동 수제비) 麵類 | 龍山 | Egg and Flour(에그 앤 플라워) 西餐 |
首爾站 | Seoryung(서령) 平壤冷麵 | 龍山 | 口福餃子(구복만두) 餃子 |
光化門 | HORAPA(호라파) 泰國菜 | 梨泰院 | YOUHAN(유한) 泰國菜 |
方背洞 | SUBARU(스바루) 烏冬 | 梨泰院 | ALT.a(알트에이) 素食韓式中菜 |
梧琴 | 玉石玹屋(옥돌현옥) 平壤冷麵 | |
以上係2025韓國米芝蓮必比登推介餐廳名單，又有冇邊間大家有興趣呢？歡迎大家食完之後同小編分享心得！
想食盡首爾？
[스팟] 韓國餐廳代客預約服務
如果有更多想知嘅內容，都可以隨時留言或者dm話俾我哋知：）
Mail：help@creatrip.com
