logo

韓星廣告收入Top 13

盤點13位最高廣告費嘅廣告商寵兒,個個身價都過億,單係SNS一個post都賺5億?

Wingyin Chan
2 years ago

Hello,大家好 ,我哋係由韓國人每日提供最新韓國旅行資訊嘅Creatrip


大家都知韓星、運動員好大部分嘅收入都嚟自廣告,最近TMI NEWS就盤點咗淨廣告收最高嘅頭13名藝人,一齊睇吓有邊個上榜啦!



廣告收入Top 13

TOP 13. 李光洙 (이광수)


身高190cm嘅李光洙,一開始以模特兒身分活動,由2008年電訊公司廣告嶄露頭角,當時廣告費只有大約80萬韓元,但就攞咗Mnet 20's Choice嘅CF Star獎。2009年喺Asia Model Festival攞CF模特兒獎。隨後開始戲劇之路,更因為出演《Running Man》而人氣急升,被稱為「亞洲王子」。2015年同金鍾國一齊幫中國一款零食拍廣告,令當時嗰款零食一年銷售量超過2000億韓元,身價隨即升至4億韓元。2017年仲進軍越南拍朱古力批廣告,令銷售額升至920億韓元。同一年仲拍免稅店廣告,代言一年就穩袋10億。計埋國內外嘅廣告,推算總共賺咗28億韓元。



TOP 12. 宋慧喬 (송혜교)


出道25年,外貌食咗防腐劑一樣嘅「韓劇女王」宋慧喬係收視保證,出演嘅每一套劇都咁有話題性,唔只韓國,仲紅到世界各地,當然深得廣告商歡心。拍過嘅廣告超多元化,有服裝、化妝品、首飾、家庭電器、汽車、甚至居苑都拍過。單喺某一個化妝品公司就代言咗21年。不過宋慧喬都好有原則,唔係咩廣告都願意拍。喺2016年,有日本汽車公司搵佢代言,佢就以唔想成為戰犯企業嘅模特兒而拒絕。就2019年嚟計,總共拍咗4個廣告,一個廣告嘅身價大約9億,即係總共賺咗36億韓元。佢代言嘅L牌嘅氣墊粉底,一年就賣咗100萬個,之後代言同一品牌嘅唇膏,亦都一個月就賣咗16萬支。最近幫某名牌手袋賣廣告,只係喺個人IG度PO一篇文,就已經值47萬7900美金,相等於5億4千萬韓元。



TOP 11. 林英雄 (임영웅)


音源大勢,媲美韓星嘅Trot歌手林英雄影響力亦非常大。2020年3月-5月間,接得最廣告排名第一,健康食品、化妝品、汽車、咖啡、淨水機、空氣清新機、醫療產品、服裝、Pizza、炸雞⋯⋯幾乎數得出嘅都有拍過,可以話一打開電視就見到佢嘅蹤影。佢拍嘅商品,銷售額即時升咗50-60%,代言嘅恤衫仲升咗510%,所以係廣告商嘅寵兒。廣告身價大約3-4億韓元,而喺2020年就拍咗16個廣告,總共收入約40億韓元。



TOP 10. 曹政奭 (조정석)


第10位就係熱播緊《機智醫生生活2》嘅主角之一曹政奭,演過多個角色,唔只係好多導演、編劇鍾意嘅演員,仲好深得廣告商嘅歡心。佢拍過嘅廣告,串連起嚟可以話係一集韓劇。2019年拍嘅吞拿魚罐頭廣告就超有中毒性,喺SNS、論壇不斷傳開,超過1億次點擊。仲有令某公司喺4年間由36億銷售額,暴升到700億。超具影響力嘅佢,廣告身價最少有5億韓元。2011年總共拍咗11個廣告,即總收入至少有55億。



TOP 9. 丁海寅 (정해인)


有「國民弟弟」之稱嘅丁海寅擁有令人醉倒嘅外貌,喺韓劇《經常請吃飯的姐姐》爆紅之前,廣告身價都有2億韓元。劇集爆紅之後,廣告多到接唔晒,單係飲品類都包羅晒碳酸飲品、咖啡、果汁。代言嘅背囊一次又一次賣清,超碼加製咗6次。代言嘅化妝品都升咗48%銷售。身價當然都3級跳,升到6億。以一年拍咗12個廣告嚟計,總收入大約56億韓元,排名第9。



TOP 8. Girl's Day - 惠利 (혜리)


第8位係女團Girls Day嘅惠利,憑住可愛有特色嘅撒嬌方式,迷倒所有當兵嘅韓國男仔。之後開始單飛拍廣告,2015年就拍咗7個,廣告身價升到2億,代言嘅商品亦升咗50%銷售額。經過韓劇《請回答1988》之後,廣告多咗4-5倍,身價再跳高2倍,推測總收入有60億韓元。



TOP 7. 朴敘俊 (박서준)


唔只韓劇、連綜藝節目都表現出色嘅朴敘俊排第7位。喺2018年被選為最受歡迎嘅廣告模特兒。唔只喺韓國,中國、越南、菲律賓等海外廣告都有拍。一年365日裏面有100日都拍緊廣告,只要開電視,就會見到朴敘俊拍嘅廣告。廣告身價超過7億韓元嘅佢,今年目前都有9個廣告以上,合計約70億韓元以上。



TOP 6. 朴寶劍 (박보검)


第6位就係有「美談自發機」之稱嘅朴寶劍。喺韓劇《請回答1988》完全演譯「崔澤」一角,成功走紅。2016年奪得演技大獎3連冠。廣告商當然抓緊機會,搵佢代言,而朴寶劍嘅廣告有一個特徵,就係以第一人稱嘅視覺出發,睇緊廣告嘅時候,就好似朴寶劍同緊自己講嘢咁,好有男朋友feel。喺2016年10月,2017年4月都登上品牌代言人第一位。朴寶劍做代言人亦一啲都唔馬虎,除咗拍廣告之外,仲喺個人SNS不斷PO相關品牌嘅個人相,出入機場時仲會著住代言嘅衫,令廣告商非常感謝佢。唔只劇集,綜藝節目亦大受歡迎,廣告身價亦不斷跳級,以2018年為準,就去到5億韓元,同一年就拍咗17個廣告,總收入達85億韓元。



TOP 5. 孫興慜 (손흥민)


第5位係足球運動選手孫興慜,亦拍過唔少廣告,洗頭水、即食麵、汽車、剃鬚刀、運動飲品等,2019年就總共拍咗12個廣告,最令人印象深刻就係跳可愛舞步嘅雪糕廣告,中毒性深到被稱為「大學試禁止曲」。當時一個一年嘅廣告身價最少12億韓元,推測廣告總收入為156億韓元。



TOP 4. 孔劉 (공유)


韓劇《咖啡王子一號店》男主角孔劉,咖啡印象深入民心,後嚟《鬼怪》一劇人氣再度急升,連帶當時造型嘅長大褸成為服裝潮流之一,廣告身價亦暴升至10億韓元,同時成為多個品牌嘅第一個代言人。雖然身價咁高,但都有過百個廣告商搵上門,孔劉最後揀咗其中15個代言,仲有一個台灣嘅廣告高達22億韓元,一年廣告總收入達172億韓元以上。



TOP 3. 全智賢 (전지현)


拍過無數電影、電視劇嘅全智賢,因韓劇《來自星星的你》掀起炸雞啤酒(치맥)嘅國際性嘅熱潮,劇中飾演「宋頌伊」一角所著嘅服裝、用嘅化妝品都即刻賣到斷貨。名牌服飾、洗頭水、網上購物網,全智賢代言之後銷售量暴升。甚至遊客最愛嘅杏仁,原來喺1988年已經推出,但冇咩人識,後嚟成為遊客嚟韓國必買手信,到全智賢代言之後,銷售額大升170%。韓劇《來自星星的你》之後,廣告身價約10億韓元,拍咗25個廣告,淨係廣告收入都高達200億韓元。



TOP 2. 金秀賢 (김수현)


同樣因《來自星星的你》爆紅嘅金秀賢,前後都拍過唔少人氣電影同電視劇,每次出演都成為話題。廣告身價由6億韓元不斷升級,最近突破10億,喺中國拍嘅廣告更有近1000萬人民幣,即大約16億5千萬韓元。韓國加埋海外超過20個廣告,總收入約300億韓元。



TOP 1. BTS


第一位大家應該都估到係邊個!就係世界彈BTS!繼上年〈Dynamite〉之後,今年憑英文歌〈BUTTER〉、〈Permission to Dance〉席捲美國Billboard排行榜、日本Oricon排行榜嘅BTS,今年最大型嘅廣告就係同全球性快餐店麥當勞合作。相關廣告費估計有100億韓元。 除此之外,仲有代言維他命、按摩椅、淨水機等13個廣告。雖然人氣高企又搶手,但佢哋竟然自願降低20%嘅廣告費,話喺疫情時期一同並肩作戰。 以2021年為準,BTS團一年嘅廣告代言費高達620億韓元。


以上就係廣告收入最高嘅頭13位韓星!睇數字真係唔知有幾多個零!唔知大家對邊個嘅廣告最深刻,最有跟住買嘅衝動呢?




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

熱門文章