東奧韓國選手靚仔特輯
東奧韓國選手靚仔特輯，每一位身材同外表都好吸睛！
Hello，大家好，我哋係由韓國人每日提供最新韓國旅行資訊嘅Creatrip。
唔知大家最近有冇睇2020東京奧運呢？真係不得不提今年香港真係超有火🔥 小編都睇到好激動🔥
睇奥運除咗好欣賞選手佢哋嘅才能之外，當然佢哋嘅顏值同埋身材都係一個重頭戲，今日小編想同大家介紹幾位參加奧運比賽，之後引起唔少熱話嘅韓國選手，有興趣嘅朋友都可以加佢哋IG睇更多佢哋日常
東奧韓國選手靚仔特輯
柔道 - 金源鎮（김원진）
- INSTAGRAM：monjiny_oly
헤럴드경제
조선일보/SBS
曾經代表韓國參與亞洲柔道錦標賽、柔道大滿貫賽、奧運60公斤級別嘅韓國柔道選手金源鎮，喺2021年柔道世界大師賽上獲得金牌，而今次2020東京奧運中，一直都被睇好可以拎獎，好可惜八強中落選。雖然後嚟敗部復活，但喺銅牌戰再次落空，成為今次奧運遺珠之憾。
因為佢野性美嘅外表同身型，喺奧運會場上獲得唔少關注。雖然連續兩屆奧運未有勇奪獎牌，但三年後嘅巴黎奧運，希望可以再見到佢發光發熱！
柔道 - 郭同韓（곽동한）
- INSTAGRAM：gwakdonghan92
조선일보
중앙일보
曾經喺2016里約奧運勇奪銅牌，同屬韓國柔道代表隊嘅郭同韓，佢壯健嘅身軀同厚實肌肉，係唔少韓國人想要嘅身材。今次同樣成為2020東京奧運亮點，但好可惜，郭同韓喺28號賽事中，不敵德國選手，喺16強止步。奪得世錦賽、亞錦賽、亞運會金牌後，奧運奪金嘅目標亦宣告破滅。
柔道 - 安昌林（안창림）
- INSTAGRAM：anchangrim73
위키트리
라디오 A's
可愛嘅外表配上壯健嘅身材，被韓國網民選為同志最愛style之一，討論度超高。今次佢喺2020東京奧運奪得男子73公斤級柔道銅牌，再度寫下個人運動史輝煌一頁。
安昌林係日本出生嘅在日韓僑，成年之後移籍韓國，成功代表韓國代表隊，喺世大運、亞洲錦標賽、柔道大滿貫賽、世界柔道錦標賽、亞運會上獲獎無數，相當厲害！
足球 - 鄭勝元（정승원）
- INSTAGRAM：seungwon_jeong
喺奧運開始之前，就已經有唔少韓國網友討論鄭勝元，佢係隸屬大邱足球俱樂部，喺足球場上被捕捉到充滿野性、但又有稚氣、靚仔嘅一面，被稱為「足球界臉蛋天才」。今次參加東京奧運，就引發全世界網友矚目。
跆拳道 - 李大勳（이대훈）
- INSTAGRAM：lee.dae.hoon
조선일보
過去李大勳包攬咗世錦賽、大獎賽、亞運會等國際比賽上嘅冠軍，獲得21面金牌。佢多年以嚟優秀嘅表現，幫韓國爭取過無數光榮，同時亦係韓國跆拳道界最耀眼選手之一，喺男子跆拳道68公斤級別排名為世界第一。
不過可惜佢同奧運金牌無緣，喺銅牌爭奪戰中落敗中國選手。賽後李大勳亦宣布退役，結束職業選手生涯，消息一出，成為奧運期間韓國討論度最高新聞之一。李大勳老婆亦喺SNS post咗親筆信，表示對老公嘅肯定。
劍擊 - 吳尚旭（오상욱）
- INSTAGRAM：ohsu.o_o
위키트리
積分排行世界排名第一嘅吳尚旭，一直係2020東京奧運中，男子劍擊奪金熱門之選，不過可惜喺8強賽落馬。喺男子團體擊劍項目之中，吳尚旭同其他隊員打入金牌戰，將延續上一次男團劍擊金牌氣勢對決意大利，再度為韓國奪得一面金牌！
七人制橄欖球比賽 - 張容興（장용흥）
- INSTAGRAM：yoheu_2
相比於其他賽事，七人制橄欖球賽觀眾熱度比較低，但仍然有一位身材結實，好令人值得注目嘅張容興選手。佢喺2020東京奧運當中獲得唔少人關注。雖然喺日本爭奪11、12位賽事中，韓國隊不幸落敗，但都刷新最佳隊史記錄。
棒球 - 李政厚（이정후）
- INSTAGRAM：hoohoohoo__
스포트뉴스
喺咁多位棒球選手之中，以同時兼具野性、英俊外表獲得關注嘅有李政厚選手，其實喺東京奧運賽事之前，韓國國內已經有唔少討論。26號由韓國前往日本，準備奧運事，唔知之後會拎到咩佳績呢？好值得令人期待！
唔知喺2020東京奧運中，大家除咗欣賞各位選手出眾嘅表現之外，仲有冇留意到邊位韓國選手嘅英俊外表呢？歡迎大家留言同小編分享。
最後希望每位代表國家或地區嘅選手都可以發揮到最高水準，爭取到屬於自己同國家或地區嘅榮耀！各位選手加油！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
