了解韓國「司機食堂」文化
司機食堂係司機先去嘅餐廳？點解有話司機食堂係美食嘅指標？一齊嚟了解韓國司機食堂嘅文化啦！
Hello，大家好，我哋係由韓國人每日提供最新韓國旅行資訊嘅Creatrip。
唔知大家有冇聽過韓國有一種好特別嘅餐廳形式，叫做「司機食堂」（기사식당）呢？司機食堂主要係提出平靚正嘅食物，俾人好方便快速咁醫肚，咁係咪司機先去得？普通人、遊客又去唔去得？邊度嘅司機食堂好食？等小編一一為大家解答啦！
韓國「司機食堂」
司機食堂嘅由來
司機食堂原本嘅漢字係「技士（기사）食堂」。大約由80年代，韓國經濟開始變得繁榮。當時唔係好似而家咁，有咁多「美食指南」，所以如果要搵好嘢食，大家都會去「司機食堂」。
因為的士司機嘅職業特性，好容易同客人交流彼此嘅美食清單，所以有一句話：「如果想搵美食，就要跟住司機去」，令好多司機嘅食堂成為美食嘅指標。
司機食堂嘅評價，係咁多個司機之間傳出嚟嘅口碑，遠比媒體上流傳嘅可信度高。除此之外，由外地嚟嘅人都會為咗食到平嘅飯菜，去特登搵當地嘅司機食堂，證明咗司機食堂喺價錢同味道方面都深受大眾嘅喜愛。
80年代嘅時候，建築物唔似而家咁起得咁密密麻麻，城中心外邊嘅地價又平啲，經營餐廳時，又有大啲嘅空間泊車，餐廳通常都係開喺巴士站嘅起點、尾站，或者的士駛入市中心時必經嘅路線，揸巴士、的士嘅司機因為方便就會去嗰啲餐廳度食飯，久而久之嗰係餐廳叫做「司機食堂」。
司機食堂嘅標準或類型
雖然喺正規嘅營運行業法規入面，冇將司機食堂作為一個獨特嘅分類，但以客人嘅立場嚟講，司機食堂一定有以下幾個條件：充足嘅停車位、價錢平、服務快、長時間（24小時）營業、一個人都可以食、營養均衡。
喺司機食堂仲可以睇到一個現象，就係幾乎冇飲酒，或者醉酒嘅人。因為去得司機食堂嘅主要係等一陣就要開車嘅司機，所以幾乎唔會見到飲酒嘅人，而司機食堂嘅酒類銷售額，同其他一般嘅餐廳相比就低好多。
咁點先算係好嘅司機食堂呢？就必須以司機嘅標準為主啦！
인사이트
由於司機嘅工時長，加上每個司機出車嘅時間都唔同，司機食堂自然就會延長營業時間，確保每個時段嘅司機都可以嚟醫肚，所以好多司機食堂都係一大早就開門去到深夜，甚至24小時。另外，每個司機都係同時間競賽，個個都想把握時間載客賺多啲錢，所以上菜嘅速度都好重要，絕對唔可以拖。
如果呢間司機食堂唔好食又會點呢？流動性高嘅司機就自自然然唔會再嚟食，甚至可能一傳十、十傳百，導致附近嘅司機都唔去。對司機嚟講，司機食堂嘅標準就係價錢、味道、上菜速度。
司機食堂提供嘅食物
식신
司機大部分時間都係自己一個食飯，間唔中會同埋啲同行嚟，所以司機食堂提供嘅都係以一人餐為主，價格亦相當平。
常見嘅司機食堂menu有五花肉、炸豬排、辣炒魷魚、拌飯等等。最熱門嘅menu就係「돼지불백（불고기 백반）」，即係炒豬肉加白飯。價錢平，用辣椒醬、醬油調味之後，用大火炒，再配埋大蒜、青陽辣椒、泡菜、生菜等，可以滿足到司機嘅胃。
一啲出名嘅司機食堂，憑住「돼지불백」嘅優勢，聲名大噪，成為眾所周知嘅美食店。
亦有一啲司機食堂採用自助餐（Buffet）嘅形式，以人頭計錢，分發一個餐盤同湯碗，吃幾多夾幾多。話就話係自助餐，但供應嘅主餐都係炒豬肉、燉雞、炸豬排，其他都係涼拌小菜、生菜、湯類等等。
司機食堂嘅特殊現象
對韓國人嚟講，司機食堂係韓國本土嘅產業，所以餐廳名大部分都係韓文（有漢字）。準確啲嚟講，司機食堂興起嘅時代係啲人仲未太識外來語嘅時期，亦都因為先前法律規定過，禁止用外來語作為店名，令到司機食堂變成咗超地道嘅標誌。
更重要嘅係，因為司機食堂主要賣韓式料理，用外來語做店名感覺都有啲奇怪！
可能大家會好奇，司機食堂有冇湯飯、大醬湯、部隊鍋、冷麵㗎呢？有係有，但對司機嚟講，如果食咗含水量高嘅食物，可能一陣揸揸吓車就會想去廁所……所以司機食堂主要準備嘅menu都是乾炒肉、白飯為主。
另外，以前嘅司機食堂仲有專門為司機提供嘅服務，例如賣揸車嘅手套、戶外送洗車服務、入錢式咖啡或乳酪等等，甚至諗到揸長線車嘅司機長期捱餓、三餐唔正常而有胃病，現場都會賣啲胃藥俾司機照顧身體。
直到而家，呢啲為司機提供嘅服務都已經幾乎消失，加上城市發展越嚟越興盛，一啲老字號嘅司機食堂都敵唔過不斷加租而關門大吉，例如過去曾經好出名嘅合井司機食堂街，而家幾乎搵唔到，只可以見到部分餐廳掛上「（舊）某某餐廳」嘅招牌，延續當年司機食堂嘅名聲。
而家嘅韓國司機食堂
喺弘大商圈另一邊嘅延南洞，有間叫「柿子樹司機餐廳」，仍然屹立不倒，成為呢一帶最出名嘅司機食堂之一。
原本只係首爾地區嘅司機大哥經常幫襯，但自從上完綜藝節目《無限挑戰》之後，成為一般人之間都相當出名嘅餐廳。食飯時間嚟嘅話，就可能要排一陣隊先入到去。呢度最出名食嘅就係之前提到嘅「炒豬肉」，用豉油醃過之後炒，加上小菜、湯等，好豐富。
司機食堂唔再淨係司機先去嘅地方，因為價錢平，又有住家味，而家好多打工仔、一般嘅市民都會去司機食堂快速咁解決一餐。
令人遺憾嘅係，公共運輸系統越嚟越發達，令的士嘅生存空間受到逼迫，連帶影響司機食堂嘅生意額。加上啱啱提到，一啲司機食堂捱唔住貴租而要執笠，未來要見到司機食堂，可能會越嚟越困難。
以上係小編整理嘅韓國「司機食堂」文化同演變，唔知大家有冇了解多咗呢類型餐廳嘅營業模式呢？之後嚟韓國玩嘅時候，可以搵吓司機食堂，品嚐一吓又local又抵食嘅美食啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
