Hello，大家好，我哋係由韓國人每日提供最新韓國旅行資訊嘅Creatrip。

明洞除咗係一個購物天堂之外，仲係一個美食天堂，喺度大家可以食到唔同美食，韓式、中式、日式、西式等通通都有，如果大家覺得每一餐都係韓國料理，開始食到有啲悶，咁不如就去食台式料理啦！而家唔使飛去台灣，都可以喺韓國食到「鼎泰豐」！只要係我哋會員，仲會送一份小食，唔想錯過就要繼續睇落去啦！

因為韓國疫情擴散，入場人數及營業時間可能會受到限制，可能需要提供疫苗護照。

有關韓國防疫政策文章, 可以查看韓國最新防疫守則。

韓國最新防疫守則｜撳我

明洞「鼎泰豐」資訊

• 地址：서울 중구 명동7길 13 2F
• 營業時間：11:00 - 21:00

明洞「鼎泰豐」優惠

• 下載優惠券，可享鼎泰豐「麵包蝦」一份。
• 落單時出示優惠券俾職員睇，喺埋單嘅時候會自動幫大家扣。
• 優惠只適用於鼎泰豐明洞店。

明洞「鼎泰豐」推薦理由

• 鼎泰豐係原汁原味嘅台灣在地品牌，喺世界各地都有超高評價，如果嚟到韓國都想食到台灣料理，可以去韓國鼎泰豐。
• 嚟旅行如果怕每日只食韓國嘢，可以去食鼎泰豐食得中式啲。
• 在韓台灣人、香港人掛住台灣味，都可以去一解「思鄉情」。

明洞「鼎泰豐」位置

• 地址：서울 중구 명동7길 13 2F
• 小Tips：乙支路入口站6號出口出嚟之後，穿過5、6號出口中間嘅大樓，喺路口偏右（經過7-11）直行見到JD鞋店之後，隔離樓梯上二樓就係鼎泰豐。

韓國雖然多好嘢食，但有時餐餐都係燒肉、炸雞、部隊鍋都會厭，更加有時可能一下子食唔慣每日都係辣嘢。就算唔係台灣人，當喺韓國好想食台灣嘢但又去唔到台灣嘅時候，小編推薦大家可以去「鼎泰豐」！

韓國同台灣一樣，入到去都可以見到廚師製作過程，大家可以睇住，食得安心又放心。

鼎泰豐明洞店都好闊落，除咗一般座位之外，仲有梳化區同包廂。

梳化區適合公司以及多人嚟聚餐嘅時候坐，好多時喺乙支路上班族，喺放工嘅時候會嚟呢度聚餐。

包廂係以國家名去改，今日小編就去咗「台灣」包廂。

Menu有中文、英文、韓文，大家唔需要怕睇唔明，另外呢到有一個貼心位係怕韓國人唔知點食小籠包，喺隔離仲有一個韓文食法講解。

呢度選擇多，當中仲有唔少韓式中華料理，真係而家望返張相都流哂口水。

經過一番掙扎，小編最後叫咗六款料理。分別係小籠包（₩7,000）、鮮蝦燒賣（₩10,000），鍋包肉（₩18,000）、擔擔麵（₩14,000）、蠔油小唐菜（₩12,000）同埋迷你奶黃包（₩5,000）。

擔擔麵탄탄면（₩14,000）

首先最快上檯嘅係擔擔麵，大家可能會覺得同平時食嘅有啲唔一樣，因為呢個係經過韓國版改良，但係佢都保留住台灣味，同時仲加多咗特色香料同辣味口感，食嘅時候會覺得好爽口，令人一食就會上癮。

小籠包샤오롱바오（₩8,500）

去鼎泰豐又點可以唔食佢哋嘅小籠包？小籠包超有台灣味，佢嘅湯好夠鮮，超好味！

食嘅時候可以點薑絲豉油一齊食，豉油加少少醋，啱啱好可以中和肉餡嘅油膩感。

蝦仁燒賣새우샤오마이（₩12,000）

雖然同平時食開港式嘅燒賣唔太一樣，不過佢粒蝦真係好鮮同好肥美，加上肉餡一齊食，好幸福！