Hello，大家好，我哋係由韓國人每日提供最新韓國旅行資訊嘅Creatrip。
平時睇韓劇，係咪都留意到有啲演員會去街邊檔食嘢？韓國稱呢啲地方做「布帳馬車」，如果大家之後去釜山，都想體驗一下，咁今日小編介紹嘅應該會幫到大家！
西面布帳馬車一條街
地址： 부산 진구 가야대로 772 로 40
營業時間： 每日 18:00 - 24:00
小Tips：西面站7號出口行4分鐘左右
由西面站7號出嚟之後一直直行。
見到第一個馬路先過。
見到T-WORLD同LG U＋喺中間穿過去一直直行。
之後就見到好似上圖嘅一個個攤擋。
因為呢度有唔少攤檔，小編都有事先喺Naver搵吓資料，發現呢一間叫做「9局下半2出局（9회말 2 아웃）」嘅舖頭都幾出名，評價亦都幾高。
一入去就會見到雪櫃擺滿好多唔同魚、魷魚、貝類等海鮮，另外呢度仲有提供雞肉、豬肉等菜式。
呢度嘅食材好新鮮，每日都係新鮮入口同賣，大家可以食得好放心。
雖然呢度Menu只係得韓文，不過大家又唔需要太擔心！因為呢度老闆好好人，如果有咩唔明，佢哋都會用英文同你解釋。大部份嘅menu，價錢幾乎都係₩11,000，不過如果怕，都可以事先同老闆確認。
嚟得布帳馬車，又點可以少咗支酒？呢度嘅菜式幾乎都係下酒菜，邊食邊飲，爽啊！
喺落完單之後，老闆就會先上小菜，有火腿蛋、蕃茄沙律、青瓜、醃蘿蔔，相當豐富！
涼拌螺肉（골뱅이무침）₩11,000
只要去布帳馬車，好多時都會叫呢一個菜，用咗螺肉、蘿蔔、洋蔥，韓國辣醬一齊炒，食落去辣得嚟又夠爽！口感特別豐富，令人忍唔住食完又食。
海鮮魚糕湯（해물오뎅탕）₩11,000
多種新鮮海鮮配上魚糕湯，呢個組合超完美，冬天食嘅話即刻覺得暖笠笠。
西面布帳馬車一條街就係喺樂天百貨店附近，好易就會搵得到！
南浦洞布帳馬車一條街
地址： 부산 중구 구덕로 80 인근
營業時間： 每日 19:00 - 24:00
小Tips：札嘎其站7號出口行3分鐘左右
札嘎其站7號出口出嚟之後直行。
見到KT之後轉左一直直行。
見到一間叫做（휴대폰 마트）SMART PHONE嘅鋪頭轉左直行。
之後就會見到南浦洞布帳馬車一條街。
南浦洞嘅攤檔除咗有賣小食之外、仲有塔羅、占卜等。
如果西面布帳馬車多年青人，咁南浦洞相對老人家會偏多。喺晏晝都可以見到佢哋圍埋一齊邊傾偈邊飲酒。
兩個地方都各有唔同特色，唔知大家又會鍾意去邊一個多呢？之後嚟釜山旅行，不妨都去布帳馬車體驗下，幻想自己係韓劇嘅男/女主角啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
