狎鷗亭「秋風嶺刀五花肉」介紹
韓星都愛嘅五花肉店，連NCT、EXO、TWICE、ASTRO、AB6IX 等韓星都去過！
Hello，大家好，我哋係由韓國人每日提供最新韓國旅行資訊嘅Creatrip。
如果問首爾有邊間燒肉店係好多明星都去過嘅話，小編會答你「幸福秋風嶺刀五花肉」狎鷗亭分店，NCT、TWICE、SUPER JUNIOR、SHINee、EXO、CNBLUE等等idol都去過！因為服務好，五花肉又好味，所以超受明星歡迎！
狎鷗亭「秋風嶺刀五花肉」介紹
「秋風嶺刀五花肉」（추풍령칼삼겹살）
- 地址：서울 강남구 도산대로51길 41
- 營業時間：平日 17:00 - 23:00、星期六16:00 - 23:00、逢星期日休息
- 小Tips：由狎鷗亭羅德奧站5號出口行6分鐘
一嚟到幸福秋風嶺刀五花肉，就見到門口貼滿韓星嘅簽名，就知道佢有幾受歡迎！亦都因為韓星嚟過，fans都跟住嚟！
餐廳附近有幾間娛樂公司嘅總部，例如SM同FNC，所以好多明星成日都會嚟。其中人氣最勁嘅係NCT，睇吓貼咗幾多貼紙！除咗NCT、TWICE、GFRIENDS、 SHINee、CNBLUE、SUPER JUNIOR、WONDER GIRLS嘅成員都嚟過。
WANNAONE、ASTRO、AB6IX、THE BOYZ⋯⋯真係多都數唔晒！
雖然好多人，但係空間好大，坐得好舒服，而且嘢食都好高質！
牆上面貼住menu，有圖，有中、英、日文翻譯，就算唔識韓文，落單都冇難度！呢度嘅招牌菜就係五花肉同泡菜鍋，老闆都好推薦叫呢兩款。
落完單之後，好快就會上小菜，同埋用嚟燒肉嘅盤。
伴菜包括有泡菜、醃蘿蔔、醃洋蔥、生菜、蒜頭、芝麻葉同辣椒，點肉嘅醬就有3種：包飯醬、鹽同黃豆粉。
五花肉（￦16,000一份）都好快就嚟到！職員會灑少少香草調味，令啲肉香啲。
燒之前，職員用豬油搽一搽個燒盤，防止痴底。因為加咗豬油，燒得更加香，比起用普通油嘅餐廳唔同，燒出嚟嘅肉都金黃色啲！
多得職員嘅幫手，啲肉燒到嚿嚿都好靚！就咁睇相，係咪都流晒口水呢？
燒好晒啲肉之後，職員會將啲肉移到燒盤最上嘅位置，以防燒燶。佢哋仲要會幫你燒啲泡菜，夾埋五花肉一齊食，真係冇得彈！
唔好唔記得仲有個泡菜鍋（￦8,000）（原本￦6,000，現已加價。），係呢度嘅招牌之一！唔會太咸，少少辣，入面仲有五花肉，配埋飯食，超正！小編食完都超推！
除咗就咁食燒肉之外，仲可以用生菜或者芝麻葉包住，加埋燒過嘅泡菜、醃洋蔥，點少少包飯醬，一齊食，口感更加清爽。
食燒肉，又點可以唔飲返杯呢？呢度有好多款酒可以揀，啤酒、燒酒、米酒等等。
俾錢嘅時候，發現EXO世勳嘅簽名，職員仲俾我哋影相，服務態度超好！
親身嚟食過之後，終於知點解咁受韓星同當地人歡迎，食物同服務都一流！提供嘅豬肉保證係100%韓國產，高質又新鮮！
如果大家嚟韓國時有計劃去娛樂公司追星嘅話，一定要嚟埋「秋風嶺刀五花肉」食燒肉啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
