2023景福宮夜間特別開放
一年得兩個月先可以睇到嘅景福宮夜景！仲唔快啲租返套韓服去影盡佢？
Hello，大家好，我哋係由韓國人每日提供最新韓國旅行資訊嘅Creatrip。
平時淨係可以日頭去景福宮參觀影相，難免有少少可惜...不過每年景福宮都會特別進行秋季夜間開放，今年（2023年）都唔例外！夜晚景福宮嘅景色同日頭截然不同，加埋燈光更加會令成個環境更有古色古香同浪漫~ 想知道活動幾時開始、會開到幾點、又有邊間韓服可以租到咁夜？記住要睇埋落去啦！
「2023景福宮夜間特別開放」資訊
- 舉辦日期：2023.09.01（星期五）- 2023.10.29（星期日）
- 活動時間：19:00 - 21:30（最後入場時間 20:30）
※ 夜間特別開放期間逢星期一同二及10月4日休息。
「2023景福宮夜間特別開放」推薦理由
- 可以同時欣賞到韓國古代宮殿同百花齊放嘅景色，享受韓國秋日風情！
- 夜晚去景福宮參觀同散步更加有另一番風味，仲有各種文化活動同表演等緊你！
- 喺首爾市中心就可以欣賞到韓國最有代表性嘅傳統文化遺產之一！
- 著韓服去仲可以免費入場！
「2023景福宮夜間特別開放」門票價錢
| 1人 （7~64歲） | ₩3,000 |
| 著韓服入場 | 免費 |
「2023景福宮夜間特別開放」注意事項
- 現場每日會限量發售200張外國人專用門票，先到先得，只可以當日使用（一人最多只可以買2張）。
- 落雨仍然會照常開放，不過因為宮內露天地方較多，建議大家要帶定遮。
- 夜晚燈光比較暗，請注意安全。
- 如有任何疑問，請send email到help@creatrip.com查詢。
「2023景福宮夜間特別開放」韓服預約
1. 宮女狐韓服
- 地址：서울특별시 종로구 자하문로 3 B1
- 營業時間：09:30 - 22:00（逢星期二休息）
- 可預約時間：
2023.09.01 - 2023.10.29 | 星期一 | 09:30 - 17:00 |
星期三至日 | 09:30 - 20:00 |
「宮女狐韓服」同其他韓服店唔同嘅係呢度冇傳統韓服，不過就有超過500幾件典雅、華麗款改良式韓服，同時仲有好多其他鋪頭冇嘅金色韓服！透過我哋預約可以免費租借手袋、帽等配飾，仲可以免費用儲物櫃~
2. In Korea韓服
- 地址：서울특별시 종로구 자하문로 2길 20 3F
- 營業時間：09:00 - 21:30
- 可預約時間：
2023.09.01 - 2023.10.29 | 星期一至二 | 09:00 - 18:00 |
星期三至日 | 09:00 - 19:30 |
「In Korea韓服」提供傳統韓服、主題韓服、公主韓服同王妃韓服俾大家揀，選擇超多！而且呢度更加提供多達8種髮型設計，透過我哋預約仲可以免費set頭添~
3. 韓服少女
- 地址：서울특별시 종로구 자하문로2길 8 3F
- 營業時間：星期一至四 09:00 - 19:00、星期五至日 09:00 - 22:00
- 可預約時間：
2023.09.01 - 2023.10.29 | 星期一至四 | 09:30 - 17:00 |
星期三至日 | 09:30 - 18:00 |
「韓服少女」除咗租借韓服費用之外，老闆幾乎唔會再另收額外費用，價錢非常合理。呢度提供超過600多套韓服，而且每一套嘅款式都唔一樣，差唔多全部都係老闆親自設計，勁特別！而且仲有識中、英文嘅職員在場，溝通唔會有問題~
4. 今天一天韓服
- 地址：서울 종로구 자하문로 2길 16 2F
- 營業時間：09:00 - 22:00（逢星期二休息）
- 可預約時間：
2023.09.01 - 2023.10.29 | 星期一 | 09:00 - 18:00 |
星期三至日 | 09:00 - 19:00 |
「今天一天韓服」提供嘅韓服好多都係老闆自己整，種類亦都比其他韓服租借鋪多，仲有2小時+2小時優惠（租4個鐘都只需要俾2個鐘嘅錢），價錢實惠！
5. 吱吱喳喳韓服
- 地址：서울특별시 종로구 자하문로2길 18 3F
- 營業時間：09:00 - 21:30
- 可預約時間：
2023.09.01 - 2023.10.29 | 星期一 | 09:00 - 18:00 |
星期三至日 | 09:00 - 19:00 |
「吱吱喳喳韓服」有超過40年歷史，韓服質素有保證，而且所有職員都經驗豐富，更加提供傳統韓服、特殊韓服、王/王妃韓服等任君選擇，款式超多！在場職員亦都識講英文、中文、日文，唔洗擔心溝通唔到。透過Creatrip預約仲會有9折優惠，唔好錯過啦！
「2023景福宮夜間特別開放」介紹
景福宮係首爾五大宮殿之中規模最大嘅宮殿，入面包括皇帝同官員商討政事嘅地方同皇族生活嘅空間，蘊含韓國朝鮮王朝500年嘅歷史。
平時景福宮最遲都係開到18:30，好少有機會可以睇到夜晚嘅景福宮景色，所以每年夜間特別開放期間都會吸引好多韓國人同遊客嚟參觀同影相，欣賞景福宮嘅另一面。機會難得，大家記住唔好錯過啦！
以上係「2023景福宮夜間特別開放」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
