Hello，大家好，我哋係由韓國人每日提供最新韓國旅行資訊嘅Creatrip。

早排好幾套韓國古裝劇被批評話同史實不符，俾人一直喺到鬧，仲有一套要腰斬。今日小編列出朝鮮王朝開國以嚟27個曾經執政嘅君王（包括被廢君王），同相關嘅影視作品，睇吓真實嘅皇帝同劇或者電影入面嘅角色形象有冇分別。大家一齊嚟重溫吓韓劇，順便了解吓朝鮮時代嘅歷史同文化背景啦！

韓劇朝鮮君王 VS 真實朝鮮君王

1. 純宗（1907至1910年在位）*大韓帝國第二位皇帝

• 相關影視作品：《The King：永遠的君主》、《宮》、《德惠翁主》

《我的公主》

朝鮮王朝末代嘅皇帝高宗喺1897年創立咗大韓帝國，1907年因為受到日本嘅威脅而傳位俾個仔--純宗。 1910 年日本吞併朝鮮，簽咗《日韓合併條約》，結束咗純宗嘅統治。大多數涉及大韓帝國滅亡嘅電視劇，都會以純宗為原型人物。

《德惠翁主》

除此之外，由孫藝珍飾演嘅電影《德惠翁主》（2016年），講嘅就係純宗同父異母嘅妹妹--德惠翁主嘅故事，亦都係大韓帝國最後一個王女。

2. 高宗（1864至1907年在位）*朝鮮王朝最後一位皇帝，大韓帝國第一位皇帝

• 相關影視作品：《陽光先生》、《明成皇后》

《陽光先生》/《明成皇后》

描寫朝鮮王朝末代君王高宗嘅韓劇，最出名嘅係《陽光先生》（2018年）同《明成皇后》（2001年）。當時面對改革同內憂外患，政局非常動盪不安，發生咗好多悲傷故事。因為高宗距離而家嘅時代相對近，喺情節編排上會較為小心，如果唔係就會好似《明成皇后》咁故事內容就被投訴同真實歷史記載有好大出入。

3. 哲宗（1849至1864年在位）

• 相關影視作品：《哲仁王后》

《哲仁王后》

《哲仁王后》（2020年）係一套搞笑嘅穿越劇，雖然睇嘅時候好輕鬆，但內裏其實隱藏住哲宗悲慘嘅身世。哲宗13歲嘅時候，哥哥因謀逆而遭處死，全家被流放到江華島，呢個就係《哲仁王后》入面，令哲宗晚發惡夢驚醒嘅陰影。不過，歷史記載中嘅哲宗係一個沉迷酒色嘅傀儡皇帝，同戲中勤政愛民嘅形象完全唔同，甚至部分台詞、情節都扭曲咗韓國史書同古人本身嘅形象，遭到好多網友批評。

4. 憲宗（1834至1849年在位）

• 相關影視作品：《興夫》

《興夫》

根據歷史記載，憲宗上位嘅時候只得八歲，所以實際嘅權力受到干擾，同頭先介紹嘅哲宗一樣係傀儡皇帝。在位期間，封建身份制度受到動搖，又有傳染病，百姓生活困苦，由丁海寅主演嘅電影《興夫》（2018年）可以了解到朝鮮憲宗時期嘅社會背景。最後憲宗早逝，由純元王后收養嘅哲宗繼位，成為後來《哲仁王后》故事嘅開端。

5. 純祖（1800至1834年在位）

• 相關影視作品：《雲畫的月光》

《雲畫的月光》

雖然韓劇《雲畫的月光》（2016年）係改編自網絡小說，主角唔係純祖，而係講述孝明世子（朴寶劍飾演）同女扮男裝嘅洪羅溫（金裕貞飾演）喺宮中嘅愛情故事，但當時嘅背景正正係朝鮮時代純組在位嘅時期，而純組就係哲宗嘅收養義父。

6. 正祖（1776至1800年在位）

• 相關影視作品：《李祘》、《成均館緋聞》、《殺王者》

朝鮮正祖在位期間，天主教開始傳入，但正祖篤信程朱理學，認定天主教係「邪教」而不斷打壓，不過歷史評價正祖係一個仁孝、執政後期有為嘅君王。提到正祖嘅影視作品，主要有李瑞鎮主演嘅《李祘》（2007年），時代背景為正祖時期嘅《成均館緋聞》（2010年），同埋玄彬主演嘅電影《殺王者》（2014年）。

7. 英祖（1724至1776年在位）

• 相關影視作品：《思悼》、《獬豸》

《獬豸》/《思悼》

朝鮮王朝中，英祖係最長壽，亦都係在位最長嘅君主。歷史上英祖最受爭議嘅係，佢將自己剩低唯一一個仔「莊獻世子 （思悼世子）」監生鎖喺米櫃餓死。電影《思悼》（2015年）將呢件事翻拍，由宋康昊飾演英祖、劉亞仁飾演思悼世子；另外，韓劇《獬豸》係講英祖（丁一宇飾演）即位前嘅故事。《同伊》（2010年）入面女主角韓孝周生嘅小朋友就係英祖。

8. 景宗（1720至1724年在位）

• 相關影視作品：《大撲》

《大撲》/《獬豸》

景宗同啱啱介紹嘅英祖係兄弟關係，在位只得四年就病逝。韓國以佢為中心嘅影視作品唔多，大部分只係因為時代背景提到，例如韓劇《大撲》（2016年），同埋《同伊》（2010年）中，禧嬪張氏被賜毒藥前將小朋友託付俾同伊，而嗰個小朋友就係歷史上嘅景宗。

9. 肅宗（1674至1720年在位）

• 相關影視作品：《仁顯王后的男人》、《同伊》

《同伊》/《仁顯王后的男人》

講得肅宗最詳細嘅韓劇，莫過於之前一直提到嘅《同伊》（2010年），池珍熙飾演嘅朝鮮肅宗當年應該係唔少人嘅夢中情人！以肅宗為背景嘅韓劇，仲有穿越劇《仁顯王后的男人》（2012年），故事背景就係發生喺朝鮮肅宗在位嘅時代，為咗保護肅宗而被追殺，一瞬間就穿越到300年後嘅現代。真實嘅肅宗在位好耐，歷史評價為一個有治國才幹嘅君王。

10. 顯宗（1659至1674年在位）

• 相關影視作品：《馬醫》

《馬醫》

以顯宗為故事背景嘅韓劇，最為人熟悉嘅係《馬醫》（2012年），但故事主角並唔係顯宗。真實顯宗在位期間，台灣鄭氏王朝派船前往日本要求支援明鄭攻打大清時，因為天氣問題漂流到朝鮮，而顯祖怕得日罪清朝，所以將船遣送去清朝，但最後船上95人全部被清朝殺害。自此之後，顯祖決定日後所有由台灣明鄭漂過來嘅船隻就地遣返，以免同類事件再次發生。

11. 孝宗（1649至1659年在位）

• 相關影視作品：《屍殺帝國》

《屍殺帝國》

同孝宗相關嘅韓國古裝劇都唔多，有啲關係嘅，普遍認為係玄彬主演嘅喪屍電影《屍殺帝國》（2018年），為影射朝鮮王朝孝宗嘅時代背景。歷史上嘅孝宗，亦都被記載為反清復明嘅勢力之一。

12. 仁祖（1623至1649年在位）

• 相關影視作品：《綠豆傳》、《推奴》、《一枝梅》

《綠豆傳》/《推奴》

朝鮮仁祖係邊個呢？就係《綠豆傳》（2019年）入面好有型嘅姜泰伍。歷史記載嘅仁祖，上位之後因為清朝攻打朝鮮，最後簽下苛刻嘅和約，令朝鮮臣屬於滿清。咁樣嘅戰亂背景，成為韓劇《推奴》（2010年）、《一枝梅》（2008年）嘅故事背景。

13. 光海君（1608至1623年在位）

• 相關影視作品：《雙面君王》、《成為王的男人》

《雙面君王》/《成為王的男人》

光海君喺朝鮮王朝嘅歷史記載中為「被廢位」嘅君王。喺壬辰倭亂時期，佢立下戰功，但因為分朝，同父親宣祖嘅關係越嚟越生疏，宣祖雖然被逼冊封咗光海君為世子，但一直都想廢除佢，所以後來光海君為咗上位，不惜借機殺死兄長、廢黜嫡母、背叛大明，導致後來「仁祖反正」，將光海軍塑造成暴君、殘酷嘅形象。不過歷史評價上認為光海君係時代背景下嘅受害者，同情他悲慘嘅遭遇。

14. 宣祖（1567至1608年在位）

• 相關影視作品：《屍戰朝鮮》

《屍戰朝鮮》

《屍戰朝鮮》（2019年）中嘅李蒼嘅原始形象就係啱啱提到嘅光海君，而宣祖就係變成喪屍嘅國王。但真實時代入面，宣祖喺壬辰倭亂，為咗抵抗日軍入侵而耗盡彈糧，最終雖然因為領導人豐臣秀吉病逝，日軍撤兵而結束戰爭，但長期以來嘅戰亂，成為咗《屍戰朝鮮》中民不聊生嘅背景。

15. 明宗（1545至1567年在位）

• 相關影視作品：《獄中花》

《獄中花》

韓國歷史記錄入面，明宗嘅形象同後代嘅哲宗好相似，由母臣掌權，20年執政期間，實際上冇太大作為。母后過世之後，明宗終於攞返政權，想進行改革之際，明宗就係真正掌權之三年就過世。韓劇《獄中花》（2016年），就係以明宗年間為故事背景，講述一個獄女幫助困苦百姓嘅故事。

16. 仁宗（1544至1545年在位）

• 相關影視作品：《師任堂》

《師任堂》

仁宗係明宗同父異母嘅哥哥，在位九個月就過世。歷史上對他嘅官方記載仁宗係因為父王去世太傷心，得病而死，但係民間相傳佢係被母后文定王后毒殺。始終在位時間太短，關於仁宗嘅紀錄好少，韓劇入面多以中宗、仁宗、明宗等時代變遷而講述故事。針對佢嘅形象，以《師任堂》（2017年）中嘅仁宗形象為主。

17. 中宗（1506至1544年在位）

• 相關影視作品：《七日的王妃》

《七日的王妃》

暴君燕山君被推翻後，中宗被擁立上位，史稱「中宗反正」，在位時廢除咗好多燕山君嘅苛政，受到歡迎。不過中宗性格優柔寡斷，一生都係充滿住大時代下嘅哀愁，中宗嘅愛人正正係支持燕山君勢力嘅一位大臣個囡。中宗上位之後，群臣上書要求廢黜中宗心愛嘅王后慎氏，以免報復勢力再起，呢個就係韓劇《七日的王妃》（2017年）嘅故事背景。

18. 燕山君（1494至1506年在位）

• 相關影視作品：《王的男人》、《逆賊洪吉童》

《王的男人》/《逆賊洪吉童》

歷史記載上，燕山君係一個殘暴嘅皇帝，自小性格粗暴，厭惡讀書，雖然成宗都認為佢燕山君唔適合繼承王位，但去世之前都冇落廢嫡嘅決定。燕山君繼位之後唔夠十年，多次發生殘暴處決、酷刑鎮壓、逼醫女或強搶民女成為官妓等事，最後遭到群臣罷黜，流放江華島，成為朝鮮歷史上第二位被罷黜嘅君王。以佢為背景嘅相關影視作品，都描述咗燕山君嘅暴政。

19. 成宗（1469至1494年在位）

• 相關影視作品：《王和我》

《王與我》

朝鮮成宗係歷史上出名嘅明君之一，在位期間完成《經國大典》嘅最後編纂，成為咗朝鮮刑法典範，奠定三司制度，不過當時嘅土地制度造成咗一定程度嘅影響同後人嘅垢病。針對成宗進行描述嘅韓劇，最有代表性嘅係《王與我》（2007年）。

20. 睿宗（1468至1469年在位）

• 相關影視作品：《仁粹大妃》、《王的偵探事件簿》

《王的偵探事件簿》/《仁粹大妃》

睿宗18歲時上位，但只有短短一年多嘅時間，19歲就過世，歷史上對佢嘅記載亦都好少，只係大概知道話佢係一個有展望嘅君主之一。提及睿宗嘅電影《王的偵探事件簿》（2017年），飾演睿宗嘅李善均點睇都唔似18歲……不過，年齡都唔太重要，因為電影故事大部分都係虛構，冇描述歷史事件。

21. 世祖（1455至1468年在位）

• 相關影視作品：《公主的男人》、《觀相》

《公主的男人》/《觀相》

後人對朝鮮世祖嘅評價褒貶不一，一方面認為佢係殘忍嘅皇帝，另一方面又肯定咗佢喺建設同文化上嘅建樹，之前提到成宗完成最後編纂嘅《經國大典》就係由世祖開始編嘅。韓劇《公主的男人》（2011年）、電影《觀相》（2010年）都有提到世祖嘅殘忍作為，例如殺害親人以奪王位，甚至進行政治迫害，出名嘅「死六臣」事件就係出自世祖嘅手（處決六位密謀令端宗復辟嘅重臣）。

22. 端宗（1452至1455年在位）

• 相關影視作品：《觀相》

《觀相》

端宗就是頭先提到世祖政治迫害下嘅一部分，在位只有短短三年，就被世祖奪去王權，被軟禁之後再流放邊疆，後嚟仲被賜藥而死，偷偷幫端宗收屍嘅百姓全家亦慘遭世祖殺害。雖然明朝有詢問端宗一事，但因當時明朝都發生復辟之變，呢件事就不了了之。最後，係兩百年後嘅肅宗年間，正式將端宗追封，入朝鮮君王宗廟，史稱「端宗復位」。

23. 文宗（1450至1452年在位）

• 相關影視作品：《觀相》

《觀相》

父親世宗過世後，身為長子嘅文宗繼位，短短兩年又隨之而去，年僅11歲嘅端宗上位。應該冇人諗到，文宗嘅細佬、端宗嘅叔叔世祖對皇位虎視眈眈，開啟咗奪位之亂。簡單嚟講，電影《觀相》（2010年）嘅故事完整交代咗文宗、端宗到世祖嘅時代。

24. 世宗（1418至1450年在位）

• 相關影視作品：《王的文字》、《朝鮮驅魔師》

《王的文字》/《朝鮮驅魔師》

大家應該都對世宗有啲印象啦掛？佢可以話係歷史上評價最高嘅朝鮮君王，唔單只完成多樣建樹，仲發明了《訓民正音》（即韓文），令韓國民族擁有自己嘅文字，奠定後世嘅發展。電影《王的文字》（2019年）中，就有講到世宗大王創立文字嘅過程；另外，近期因受到批評而播咗兩集之後腰斬嘅《朝鮮驅魔師》（2021年）入面，張東潤飾演嘅就係年輕時嘅世宗。

25. 太宗（1400至1418年在位）

• 相關影視作品：《六龍飛天》、《我的王國》、《朝鮮驅魔師》

《六龍飛天》/《我的王國》

太宗為咗皇位亦都有好多風波，朝鮮歷史上，太宗發動咗兩次王子之亂，殺死2名兄弟，流放其他人，而最後太宗成功繼位哥哥定宗嘅王位，成為朝鮮王國第三任皇帝。除了韓劇《六龍飛天》（2015年）、《我的王國》（2019年）之外，被腰斬嘅《朝鮮驅魔師》都有太宗嘅角色（甘宇成飾演）。太宗晚年嘅建樹，例如完善咗父親太祖嘅「科田制」、實行統一嘅府兵制等等，獲得好評，禪位俾世宗之後，被尊為上王，奠定後來王位傳嫡長子嘅規則。

26. 定宗（1398至1400年在位）

《六龍飛天》

朝鮮定宗為太祖嘅次子（長子早逝），本來太祖傳位俾第八個仔，但太宗發動王子之亂之後繼位，但短短兩年之後，太宗又強迫定宗禪位俾自己，甚至係定宗死後，唔承認定宗為朝鮮王朝正統，直到數百年後嘅肅宗先追封返「定宗」嘅稱號，認定為朝鮮第二代君王。

27. 太祖（1392至1398年在位）

• 相關影視作品：《鄭道傳》、《大風水》

《鄭道傳》/《大風水》

朝鮮時代嘅開國君王「太祖」，原先為高麗王朝最後一任君王高麗恭讓王嘅臣子，後嚟起兵謀反，強迫高麗王退位，甚至殺害、流放高麗宗室。當時高麗宗室為咗躲避追殺，紛紛將王氏改做其他姓氏，造就咗而家韓國姓王嘅人唔多。

以上就係朝鮮時代所有君王嘅歷史，同埋一啲相關影視作品嘅介紹，唔知道大家對朝鮮時期嘅歷史變遷有多啲了解呢？

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購