Hello，大家好，我哋係由韓國人話你知每日最新韓國資訊嘅Creatrip。

相信大家嚟韓國旅行嘅時候，最期待就係夜晚返到酒店叫炸雞外賣啦！唔單止可以品嚐到最正宗嘅韓式炸雞，仲可以體驗到韓國驚人嘅外賣速度。

不過韓國咁多炸雞品牌，如果淨係識橋村炸雞、BHC、Nene Chicken呢啲嘅話就太OUT啦！今日就等小編話俾大家知，韓國人最鐘意食乜嘢口味嘅炸雞啦！

2020韓國人票選炸雞排名

最近係韓國DC Inside網上討論區入面，一班韓國網民就投票揀出咁多炸雞品牌入面 TOP10嘅炸雞口味，有部分喺香港都可以食得到㗎！

呢個投票純粹係叫大家揀自己鍾意食嘅口味，快啲一齊嚟睇吓韓國人到底鍾意食乜嘢口味嘅炸雞，同埋睇下有冇你心目中嘅炸雞上榜啦！

第10位：Nene Chicken 初雪炸雞

喺原味炸雞上面灑滿濃濃嘅芝士粉，而且仲有香噴噴嘅奶香味，各位芝士控一定唔可以錯過啊！呢個口味係香港都可以食得到！掛住韓國炸雞嘅話，可以去香港嘅Nene Chicken止止癮先！

第9位：起家雞 頂級甜辣炸雞

同一般嘅甜辣炸雞唔一樣，呢款頂級甜辣炸雞加咗起定雞獨家秘製嘅韓式白醬，令口感更加豐富！

第8位：BHC 中式醬油

BHC獨有嘅中式醬油味，由蒜蔥醬油調配而成嘅醬料，加上黑芝麻同埋辣椒，鐘意重口味嘅朋友仔一定要試下！

第7位：HOSIGI炸雞 辣味醬油炸雞

韓國人評價呢一間係CP值最高嘅炸雞店，價錢唔貴又可以雙拼口味。之後嚟韓國旅行不妨試下呢一間啊！

第6位：Goobne Chicken 辣味烤雞

主打唔經油炸嘅健康炸雞，所以韓國人都好鐘意Goobne，食落冇咁大罪惡感丫嘛！呢款辣味烤雞係肉汁滿滿嘅雞肉外層，搽上香味十足嘅醬汁，真係令人一試難忘啊！

第5位：Pelicana Chicken 調味炸雞

身為韓國最初嘅炸雞品牌，又點會唔上榜呢！炸雞外層酥脆，內層鮮嫩可口，簡直係人間美食啊！

第4位：橋村炸雞 辣味Combo

相信大家對橋村炸雞唔陌生！佢哋嘅Combo即係指雞鎚+雞翼嘅組合，香辣得嚟又脆卜卜嘅表皮，真係會食到停唔到口啊！

第3位：Nene Chicken 大蔥炸雞

嚟到季軍！唔食蔥嘅朋友仔應該會好抗拒，不過呢款口味可以有三種食法，原味就咁食、點醬食、夾住蔥食。不過原味炸雞夾住大蔥一齊食，都算係韓國一種地道嘅食法嚟㗎，大家有興趣都可以試下！

第2位：BHC 芝士炸雞

呢款芝士炸雞真係小編自己嘅私心最愛！炸雞表皮灑滿曬香濃嘅芝士粉，每一啖都係幸福嘅感覺！同埋BHC係加芝士粉方面真係好大方！

炸雞每一個位都鋪滿咗之餘，連盒底都係滿滿嘅芝士粉，小編同好多韓國人一樣都會忍唔住就咁食啲芝士粉XD

第1位：BBQ Chicken 黃金橄欖炸雞

嚟到第一名！BBQ Chicken獨家研發嘅配方，用橄欖油低溫油炸，令到外皮更加香脆可口又唔會有油膩感。

睇到呢到大家係咪好掛住韓國炸雞呢？而家好多炸雞品牌，例如Nene Chicken、BHC Chicken、Gooben Chicken等等係香港都有開分店！暫時嚟唔到韓國旅行，都可以喺香港嘅分店食住先，止一止思鄉嘅情懷啊！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

  韓國代購