韓國交通卡總整理
韓國交通卡點樣分？除咗T-Money之外，原來仲有其他？用淨嘅錢可唔可以拎返？
Hello，大家好，我哋係由韓國人每日提供最新韓國旅行資訊嘅Creatrip。
嚟韓國旅行成日都要搭地鐵同巴士，所以嚟到一定要買返張T-money，如果冇就要次次入錢、買飛，都幾麻煩，所以小編整理咗常見嘅韓國交通卡種類、教學，同埋一啲最新訊息，希望可以幫到大家，下次嚟韓國玩，就唔使咁煩惱啦！
韓國交通卡總整理
1. 地鐵一次性交通卡（首爾地鐵）
每個地鐵站閘口，都會有呢種一次性地鐵交通卡嘅售票機，同時可以用佢嚟增值，機上面可以揀中文、英文、韓文同日文，唔驚睇唔明。
不過提提大家，一次性交通卡（要俾保證金）比用T-Money搭地鐵會貴少少。
| 一次性交通卡 | T-Money |
| ₩1,350 | ₩1,250 |
| 搭得越遠，就會再貴啲。 | |
| 保證金₩500 | - |
退還一次性交通卡時，可以拎返₩500保證金。
喺首爾搭地鐵，一次性交通卡比T-money貴₩100，而且仲要另加₩500保證金，雖然會退返俾你，但每搭一次就要再買同退錢，其實都幾麻煩。不過喺釜山、大邱等地鐵站，一次性交通卡就冇咁複雜，但同樣如果係用T-Money等交通卡搭地鐵，就可以享有轉乘優惠，點計都係比一次性交通卡平啲！
2. 交通卡點買？點增值？
嚟韓國真係成日都要搭大眾交通工具，推薦大家嚟到一定要準備一張交通卡，無論係搭地鐵，巴士、的士定係火車都可以用到交通卡，地鐵轉地鐵、地鐵轉巴士，轉車都會有優惠。
韓國交通卡可以喺全國便利店、地鐵站交通卡無人自動販賣機（1至4號線）、i Center（5至8號線）、網站商店等到買。另外持有長期簽證嘅朋友，申請銀行卡嘅時候，仲可以綁埋交通卡，佢會幫你自動增值同扣錢，好方便。
喺便利店買交通卡，大約₩2,500至₩5,000不等，買嘅同時仲可以增值，通常可以增₩1,000至₩90,000不等，而每張卡片裡面最多可以有₩500,000。如果係青少年、幼兒買優惠交通卡時，需要出示出生證明，職員就會幫大家去set，另外如果喺GS25、CU買完嘢之後，淨低嘅散紙可以用嚟增落交通卡入面，最小單位為₩10，如果唔想下下都俾現金，用交通卡俾錢亦都得（就好似香港八達通咁）。
3. 韓國交通卡種類
1) T-Money
T-Money交通卡喺韓國最常見，唔單止可以喺便利店買嘢，仲可以搭巴士、地鐵、火車（無窮花號）、的士等等，而且會同好多藝人、品牌聯名，超多款式可以揀。
T-Money常見問題
1. T-Money餘額太多，可唔可以退錢？
答：卡入面金額如果係₩20,000以下，可以喺便利店退款；超過₩20,000以上，就要自己去T-Money總部辦理（手續費係₩500）。
2. 空卡可唔可以退？
答：唔可以，但可以留低當做紀念。
3. T-Money有冇使用期限嗎？
答：冇，卡片上嘅日期只係用嚟參考。
4. T-Money除咗搭地鐵之外，仲有咩好處？
答：增完值之後可以喺便利店消費，唔使次次都要找錢，而且坐的士用T-Money俾會有紀錄，如果要投訴，或者唔見咗嘢，可以好快搵到係邊架車。
2) Cashbee
Cashbee算係韓國第二普及嘅交通卡，同樣可以用嚟搭地鐵、巴士、火車、的士等。目前除咗首爾地區，其他部分城市地鐵都可以用（唔可以喺大邱地鐵站增值），部分城市，好似慶南地區等都係用唔到。
至於Cashbee相關問題，同T-Money問題一樣，可以參考吓。
備註：大田地鐵由2018年起可以用Cashbee
3) Creatrip X BELLYGOM 限量聯名交通卡
BELLYGOM係一隻喺韓國超受歡迎嘅卡通人物，今次我哋爭取到同BELLYGOM合作推出限量又獨一無二嘅交通卡，搭車同喺便利店+指定店鋪消費都可以用！而且只要事先預約，30秒內可以輕鬆換領，我哋仲會先幫你入定₩5,000，等你可以攞到即用！仲可以透過Creatrip App隨時確認餘額&交易記錄，夠曬方便！
Creatrip限量BELLYGOM聯名交通卡 | 撳我即買
4) 遊客專用交通卡
Discover Seoul Pass（首爾轉轉卡）
首爾轉轉卡（Seoul Pass）係首爾觀光公社為咗遊客方便，喺指定時間內，可以喺首爾市內55個景點免費入場，或100多個景點、行程優惠，另外仲可以當佢係交通卡咁增值，而且仲可以免費搭一次AREX機場鐵路。
24小時 | ￦50,000 |
48小時 | ￦70,000 |
72小時 | ￦90,000 |
BTS轉轉卡已售罄、手機Pass冇交通卡功能 | |
M PASS
M PASS比較少人知，佢只可以喺首爾、濟州島用，主要係為咗嚟首爾遊客設計嘅一日地鐵交通卡，除咗新盆唐線、京春線、紅色巴士之外，都可以用到。而M PASS限制係當日只可以搭20次，對旅客嚟講，基本上應該係用唔哂，用完仲要還先可以拎返₩5,000保證金。
一般售價 | 17:00後買 | |
一日券 | ₩15,000 | ₩12,000 |
兩日券 | ₩23,000 | ₩20,000 |
三日券 | ₩30,500 | ₩27,500 |
五日券 | ₩47,500 | ₩44,500 |
七日券 | ₩64,500 | ₩61,500 |
小編個人覺得M PASS唔太實用，如果一日去四個行程，搭地鐵都唔使₩10,000，不過如果驚去錯月台、唔敢請工作人員幫手嘅話，有M PASS就唔使驚啦！
M PASS購買/退還地點
- 仁川機場T1諮詢中心（5號、10號GATE）；營業時間：07:00 - 22:00
- 濟州機場綜合資訊台（1號GATE）；0營業時間：7:00至22:00
- 首爾站T-Money Towen（首爾站10號出口）；營業時間：09:00 - 18:00、週末休息
- 明洞觀光資訊情報中心（乙支路入口站5號出口）；營業時間：09:00 - 20:00
備註：還卡時保證金需再扣₩500
Amazing Pay T-Money
有咗Amazing Pay T-Money搭仁川機場巴士，去某一啲景點、睇表演、餐廳等都有折扣優惠（購買時會有優惠冊），除咗以上特點之外，就同一般T-Money冇咩分別。
| 售價 | ₩50,000 空卡₩4,000、增值₩46,000 |
| 地點 | 仁川國際機場T1 一樓4號、9號出口CU |
| 退還 | 卡內剩餘金額 再扣₩4,500 |
Korea Tour Card
呢個都係專為外國遊客而設嘅交通卡，可以搭地鐵、巴士、的士，全韓國各地景點都享受優惠，除咗基本卡費₩4,000之外，同T-Money使用方式一樣，冇有效期，更加方便。
Korea Tour Card購買地點
- 7-11
- e-mart24
- 機場鐵路（首爾站、金浦機場站、仁川國際站）
- 各大地鐵站
- 友利銀行（仁川機場分行）
- 新韓銀行（仁川機場分行、明洞站分行、弘益大學分行、明洞分行、濟州機場分行、金浦機場分行）
- 仁川機場濟州航空櫃位
5) NAMANE卡
NAMANE係一張可以當交通卡用之外，同時仲可以做埋扣賬卡，Download佢哋app仲可以睇到過往所有碌卡紀錄同堆增值，交通卡同扣賬卡餘額分得好清楚，大家仲可以將啲錢交換咁用。
大家可以用偶像，或者旅行中想留念嘅相去設計，透過我哋買仲可以平啲添！ 因為卡唔會寫名，唔需要認證就用到，同時冇年齡限制，重點係外國人都用到。全國大約有200幾個景點，提供24小時無人機器，明洞站、首爾站、教保文庫弘大店等都有。
4. 點查交通卡仲有冇錢？
除咗地鐵入閘嘅時候，可以睇到收幾多同淨幾多之外，亦可以透過地鐵機器（增值機），擺上去睇下仲有幾多錢，如果係iPhone7以上用戶（系統需ios13以上），亦可以download「BucaCheck」呢個App，確認餘額有幾多，而Android用戶如果有NFC功能，一樣都係down app睇就可以。
以上係小編整理出嚟韓國交通卡介紹，希望可以幫到大家啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
