韓國新型植入式廣告（PPL）
睇韓劇時廣告無孔不入好出戲？而家有新型賣廣告方法！唔知大家又受唔受落？
Hello，大家好 ，我哋係由韓國人每日提供最新韓國旅行資訊嘅Creatrip。
睇開韓劇、綜藝節目，都成日見到植入式廣告，韓國將呢個做法簡稱叫「PPL」（Product Placement）。早前仲因為出現廣告過多，甚至係中國品牌嘅商品，唔少觀眾大叫出戲而成為熱話。新入坑嘅韓劇、韓綜fans唔知咩係PPL？可以撳入以下link了解多啲！
韓國新型植入式廣告
要喺劇集入面落廣告得自然，其實好考編劇嘅功力，唔係嘅話就會好突兀。隨住觀眾越嚟越醒目，要不知不覺咁滲入廣告嘅難度越嚟越高，唔知係咪因為咁，最近編劇同導演反而變得明目張膽，擺明車馬話俾觀眾知：「我而家就係賣緊廣告！」今日就睇吓韓劇《都市男女的愛情法》 (도시남녀의 사랑법) 係點賣廣告啦！
就咁睇，好似平時咁借演員食Pizza嚟賣Pizza廣告，但再細心啲睇，後面嘅客人著住寫住PPL嘅衫！見到呢個畫面真係笑咗出嚟！
唔只Pizza，仲有朱古力奶！除咗裝住朱古力奶嘅杯show咗牌子名之外，演員一拎起杯朱古力，登登！PPL又同大家say Hello!
本身係植入私家車嘅廣告，點知打開後尾箱！有個紙箱寫住「PPL」，唔知呢個係導演，定工作人員嘅idea呢？真係好有創意！
仲有安排台詞！不過唔係大家所諗嘅讚吓產品有咩好，而係話：「啊，要show個logo出嚟？」就好似同廠商（？）觀眾（？）互動緊咁！超鬼馬！
又或者唔用口講，打出嚟俾你睇：「《都市男女的愛情法》係有包含廣告㗎。」
甚至直接請求老闆搵佢代言：「廣告商老闆…拜託同我聯絡…」 ，唔⋯⋯究竟睇緊劇，定廣告試鏡大會？
唔知大家睇嘅時候有咩感覺呢？大家又鍾意以前嘅植入式廣告，定係呢種明入式廣告呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
