閔熙珍HYBE內鬨事件懶人包
「唔係我背叛HYBE，而係HYBE背叛我」... 閔熙珍HYBE內鬨事件嘅來龍去脈係點？
Hello，大家好，我哋係由韓國人每日提供最新韓國旅行資訊嘅Creatrip。
早前HYBE提出要指控NewJeans所屬廠牌ADOR代表理事閔熙珍，小編本身以為會風平浪靜咁過，點知而家成為全城熱話。到底喺呢場被稱為史無前例嘅勁爆記者會入面有提及到咩內容？
想直接睇最新更新內容？
打開目錄就可以跳到你想睇嘅部份！
閔熙珍HYBE內鬨事件
時間線
閔熙珍HYBE內鬨事件 |
[4月22號] HYBE懷疑閔熙珍密謀搶奪經營權， 要求進行搜查 ↓ 向閔熙珍提出 暫停一切代表理事職務同卸任嘅要求 ↓ 閔熙珍主理品牌ADOR發出官方聲明， 表示從來冇打算搶奪經營權， 只係打算內部舉報抄襲問題 [4月25號] HYBE發表聲明， 表示將會正式控告閔熙珍 ↓ 閔熙珍召開緊急記者會 ↓ HYBE對記者會內容作出回應 [5月7號] 閔熙珍一方向法院申請暫時處分， 要求禁止HYBE喺ADOR臨時股東大會 行使表決權嘅權利 [5月14號] 其中一位NewJeans成員媽媽 接受媒體電話訪問，公開立場 [5月17號] 法院就住7號閔熙珍一方提交嘅申請進行聽證會， 房時爀同NewJeans 5位成員 以個人名義提交請願書 [5月24號] 法院收集好所需資料之後， 將會喺臨時股東大會前進行決議 [5月31號] 預定召開ADOR臨時股東大會， 就罷免閔熙珍代表理事一職議案進行表決 |
HYBE提出控訴
HYBE喺4月22號發表聲明，入面講到發現閔熙珍同ADOR管理層向外部投資者提供秘密文件同合約，亦都喺群組聊天室入面提及到要脫離HYBE、將ADOR變成空殼公司等等嘅字眼，懷疑佢密謀搶奪經營權，所以要求進行全面搜查。
HYBE亦都指控閔熙珍背後其實有個神婆操控緊佢經營公司，亦都公開咗佢同神婆嘅聊天記錄，當中神婆叫閔熙珍3年內要搶走間公司，亦都有段對話係閔熙珍問神婆到底BTS會唔會入軍隊服兵役等等，令人覺得佢計劃緊奪權。喺各種證據下，HYBE喺25號表示將會正式控告閔熙珍。
閔熙珍緊急記者會內容
연합뉴스
閔熙珍琴日（25號）韓國時間3點召開咗個緊急記者會，喺記者會入面佢唔單止澄清咗自己嘅立場、公開咗佢同HYBE董事長房時爀以前嘅對話，更加留低咗一句名言：「唔係我背叛HYBE，而係HYBE喺背後插咗我一刀」。
閔熙珍喺記者會上面不斷強調今次事件根本唔係因為佢想搶走經營權而發生，而係想內部舉報HYBE旗下由房時爀主理嘅音樂廠牌BELIFT LAB，提出抄襲異議。
而佢想控告嘅就係一出道即刻上曬音樂排行榜榜首嘅女團ILLIT（아일릿），無論係風格定妝髮，都同NewJeans有相似嘅地方，連佢哋隻舞都有幾個step會令人即刻聯想起NewJeans。閔熙珍表示如果連旗下廠牌都互相抄襲，最後呢間公司嘅音樂只會變成千篇一律，而佢會直接提出異議嘅原因亦都係希望改咗呢個風氣。
根據閔熙珍嘅講法，佢同HYBE會產生分歧喺由LE SSERAFIM組成開始。本身HYBE同佢講佢培育嘅女團（而家嘅NewJeans）將會成為HYBE嘅第一隊女團，團員同佢哋嘅家長都知道，不過突然就變成LE SSERAFIM出道先。佢覺得無論係對自己定對NewJeans同佢哋嘅父母都好唔公平，所以閔熙珍決定自己創立ADOR。
한겨레
而且佢都有講到，今次ILLIT出道之後佢先發現，原來HYBE如果想push一隊團體，原來可以搞咁多宣傳。NewJeans出道當時，因為HYBE打算先push LE SSERAFIM，所以HYBE有3-4個月都唔俾閔熙珍宣傳NewJeans，認為待遇根本唔公平。
閔熙珍喺記者會上面都提及過好多次NewJeans，佢話佢同呢幾個女仔嘅關係比大家想像中close，發生呢件事之後成員都有即刻打電話俾佢，更加有位成員喊住話幫唔到手覺得好對唔住佢。另外佢亦都表示家長們好支持佢公開內幕，而且其實抄襲事件係家長們要求公司進行解釋。
閔熙珍亦都有反駁有關自己被神婆操控呢個論點，佢表示話神婆只係自己嘅朋友，會問到BTS入伍問題係因為BTS本身就好紅，如果佢哋入伍嘅話，NewJeans應該可以得到更多資源去搞宣傳，亦都唔會被掩蓋，自己只係站在一個媽媽嘅角度問。
SBS뉴스
而對於HYBE向媒體公開嘅群組聊天記錄，閔熙珍表示只係講笑咁講，完全冇咁嘅企圖。閔熙珍反而仲喺記者會上面公開佢同房時爀以前嘅對話，當時房時爀請佢入hybe嘅時候講到自己係成功嘅粉絲，會盡力為佢提供資源。但係現實同承諾並唔一樣，就算NewJeans上咗Billboard都冇恭喜過佢。而對話當中房時爀居然有問過閔熙珍：「에스파 밟으실 수 있죠? [你應該可以將aespa踩喺腳下(打贏佢哋)㗎可？]」，令大眾非常驚訝。
중앙일보
全場記者會歷時2個幾鐘，喺記者會入面閔熙珍有同記者發生過衝突，一邊解釋同澄清立場途中亦都有爆咗幾句粗口，引起唔少人關注。事後HYBE發出官方聲明，表示記者會上有好多論點都唔係真嘅，亦都話閔熙珍陳述嘅時候歪曲咗事件因果關係，所以根本冇必要一一反駁，決定唔會作出回應。
鍾意韓國明星嘅話唔可以錯過...
[新!] 閔熙珍向法院申請禁止HYBE行使表決權
記者會之後，雙方宣佈將會喺嚟緊31號將會召開ADOR臨時股東大會，決定會唔會罷免閔熙珍作為代表理事嘅職位。之後閔熙珍喺5月7號向韓國法院申請暫時處分，要求禁止HYBE行使表決權嘅權利。
其實原因好明顯，因為HYBE持有ADOR股份嘅80%，係ADOR最大股東，而閔熙珍只有18%，如果唔咁做嘅話，就算拉攏到其他股東，閔熙珍都一定會被罷免。
한국경제
閔熙珍一方表示，HYBE同閔熙珍簽合約嘅時候，為咗保障閔熙珍身爲ADOR代表理事同社內理事嘅職權，5年期間都可以喺股東大會行使表決權。另外如果真係被罷免，唔單止閔熙珍本人，更加會影響到NewJeans、ADOR同HYBE日後發展，所以希望法院可以下令禁止。
이투데이
5月17號，法院就住上述申請進行咗聽證會，聽證會當中房時爀嘅請願書被公開，係佢喺內鬨事件發生後第一次公開立場。房時爀提到，雖然有唔少人覺得閔熙珍點出咗一間公司擁有多個音樂產牌嘅時候會出現嘅問題，不過佢絕對唔容忍出現因為呢種“惡意”舉報行為而令相關system被摧毀嘅情況。
MBC
而最令人關注嘅係連NewJeans成員們都以個人名義提交咗請願書，雖然冇被公開，不過相信會係支持閔熙珍一方嘅內容。
한국일보
法院表示將會喺24號收集好所需資料之後，喺臨時股東大會前進行決議。如果決議通過，HYBE喺會議入面就冇得行使決定權；相反如果決議冇通過，閔熙珍幾乎係一定會被卸任。
[新!] NewJeans成員父母公開立場
연합뉴스
原來早喺呢場記者會之前，NewJeans成員們嘅家長就有向HYBE提出過疑問。根據NewJeans所屬產牌ADOR表示，閔熙珍喺4月3號嘅時候幫家長們整理好立場同建議內容之後send咗email俾HYBE！
MK스포츠
Email內容入面有提到，家長們覺得喺HYBE另一個產牌新出道嘅女團嘅風格同NewJean相似，懷疑係抄襲；另外亦都有講到話房時爀平時經常無視NewJeans，就算成員們向佢打招呼都會扮睇唔到，覺得身為公司老闆居然對旗下藝人差別待遇，甚至係唔尊重佢哋。（亦都有唔少網友眼尖發現房時爀從來冇出現過同NewJeans嘅合照！）
한겨레
其中一位成員嘅媽媽之後亦都通過電話訪問表示，HYBE曾經同佢哋講話打算喺NewJeans喺東京巨蛋開完演唱會之後，就俾佢哋放一次“長假”，但係根本冇人知到底真係普通假期，定係打算冷凍佢哋... 呢位媽媽亦都有提到，所有成員嘅家長都希望自己個女可以一直同閔熙珍合作落去，睇得出唔單止係成員們，連佢哋爸爸媽媽都非常支持閔熙珍。
有趣小插曲
조선일보
HYBE同閔熙珍嘅內鬨事件對於韓國音樂界係一件影響唔細，甚至可以話都幾嚴重嘅事，不過都有發生啲令人忍唔住笑出嚟嘅小插曲。第一樣小編覺得最fun嘅係有人搵出咗閔熙珍記者會上面件衫同帽嘅資訊，當日就即刻全部賣斷貨（小編OS：真係不愧係鍾意跟風買衫嘅韓國人）！
전자신문
另外一樣都幾多人發現嘅點同ZICO有關。ZICO嚟緊將會同Jennie合作推出新歌《SPOT!》，琴日公開咗最後一張預告相，不過居然比起原定時間遲咗少少公開！咁啱原定公開時間係閔熙珍開緊記者會嘅時候，有好多網民都笑稱職員全部都走咗去睇直播冇認真返工，所以先miss咗XD
以上係小編整理出嘅閔熙珍HYBE內鬨事件懶人包，有咩最新消息小編會一直update，想知後續記住要save低篇blog啦！
自認係KPOP Fans？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
